Uvalo kosopolitiki ngeMatatiele
Nokubekelwa izikhundla Sebecela
KUVEVEZELA amabhulukwe kosopolitiki abangaphansi kukaMasipala waseMatatiele, e-Eastern Cape, ngenxa yodaba lwawo olusematheni lokuthi ungase ubuyiselwe KwaZulu-Natal.
Kuvela ukuthi abanye osopolitiki sebeqalile ukuxhumana nozakwabo KwaZulu-Natal beqinisa ubuhlobo, becela nokubekelwa izikhundla ukwenzela ukuthi uma kwenzeka umkhumbi uwela, bangaphelelwa yisinkwa.
Lolu daba luxaka ngisho neMeya yalo Masipala, uMnu Momelezi Mbedla, ebibize isigcawu sabezindaba ngoMsombuluko, okuthe uma iphoswa imibuzo yanxusa ukuba kungabhalwa izinto ezibucayi ngayo njengoba nayo izwe sekukhulunywa komabonakude ukuthi idolobha layo liyakhukhula libheke KwaZulu-Natal.
Ithe ikholwa wukuthi kusenohlelo lwephalamende oluqhubekayo, kuzoxoxwa nabo bewumasipala uma sekufike isikhathi - kuxhunyanwe nomphakathi.
UMnu Mbedla ubonakale enengcindezi njengoba kubikwa ukuthi amalunga omphakathi - kubalwa nezisebenzi zikaMasipala waseMatatiele - akhuluma ngalo lolu daba. Abanye kabakufihli ukuthi bafisa isheshiswe eyokubuyiselwa kweMatatiele KwaZulu-Natal.
"Ngizocela siyekele abakhulu ephalamende baqhube umsebenzi wabo, singenyusi amaphaphu ebantwini," kusho uMnu Mbedla ebhekise kwabezindaba.
Lo masipala ubalwa nehamba phambili e-Eastern Cape ngokuyisa intuthuko kubantu, wukuphathwa kwezimali nokuhlanzeka kwedolobha - okuyinto obugqame ngayo nangesikhathi useKwaZulu-Natal. Yize kungasafani nakuqala njengoba umgwaqo osuka eKokstad ulibangise eMatatiele unemigodi - njengoba uMnu Sello Ntai eke waba sengozini ngenxa yayo - kodwa abaphathi bakamasipala ngaphansi kwesandla sikaDkt Tsepang Nakin, basasibambile isithunzi sawo.
UMnu Mbedla ufisa ukuba izinhlelo zephalamende zingaphazanyiswa ngodaba lwaseMatatiele nje, kuvela ukuthi yingoba i-African National Congress (ANC) kuzwelonke ivumelene ne-African Independent Congress (AIC) ngaphambi kokhetho lohulumeni basekhaya obelumhla zintathu kuNcwaba (August) nyakenye ukuba basebenze ngokubambisana ukuze (i-ANC) ithole uMasipala waseKurhuleni, eGauteng.
I-AIC kuthiwa ivume ngombandela wokuthi kubuyiselwe iMatatiele KwaZulu-Natal. Nokho uMnu Mbedla ukuphikile lokhu.
UMnu Kenny Biggs, oyikhansela leDemocratic Alliance (DA) kuMasipala waseMatatiele - obelwa nokuthi lowaya masipala uyiswe e-Eastern Cape - uthi nabo basalindele ukuzwa imizwa yomphakathi.
Ukhala ngokuthi inkinga kukho konke lokhu kusetshenziswa imali yabakhokhi bentela budlabha.
"Kunzima ukuba singaphumela obala singakezwa ukuthi umphakathi uthini kodwa okubuhlungu wukuthi kusithathe iminyaka eli-11 ukuba iMatatiele ikwazi ukusebenza kahle e-Eastern Cape njengoba ubona ukuthi imigwaqo iphelile nezinye izinhlelo ziyama, okusho ukuthi kusazophinda kusithathe eminye iminyaka futhi ukuba sishintshelwe KwaZuluNatal," kusho uMnu Biggs.
UMnu Wele Mdolomba, oyikhansela le-AIC, uthi akangabazi ukuthi abantu baseMatatiele bafuna ukuba ngaphansi kwaKwaZulu-Natal. Nakuba lwenziwe lonke uhlelo kwavotwa kodwa uMnu Scelo Shiceka (ongasekho) obengungqongqoshe wezokubusa ngokubambisana nezomdabu kuzwelonke, wagcina ngokwenza isethembiso - lutho ukukhipha imiphumela yamavoti.