BASONGA UKUBOPHA UMNYANGO WEZEMPILO ABASHONELWE
UNYONYOBELWA yizindleko uMnyango wezeMpilo KwaZulu-Natal njengoba umndeni wakwaGumbi eNgonini eNgwavuma, enyakathompumalanga yeKwaZulu-Natal, usonga ngokuthathela isibhedlela iMosvold (esiseNgwavuma), izinyathelo zomthetho ngokudlula emhlabeni kwelunga lawo.
Umndeni uthi uNkk Velephi Gumbi (47) udlule emhlabeni ngendlela engaqondakali kanti usola ukuthi ubenganakekelwa ngendlela efanele. Kubikwa ukuthi ungeniswe kulesi sibhedlela ngoNhlolanja (February) emuva kokuba ephume kwakhe eya emtholampilo wendawo, eNkungwini exinwe yisifo sofuba.
Emtholampilo ubizelwe i-ambulensi waphuthunyiswa eMosvold. Uyalelwe ukuba aqale ukudla amaphilisi alesi sifo. Ubuye wayalelwa ukuba angabe esaqhubeka nawo ngoba kuthiwa seselaphekile.
Ngokuthola kwaleli phephandaba, mhla zili-16 kuNhlolanja, umufi udluliselwe esibhedlela iNkosi Albert Luthuli Hospital, eThekwini. Engakafiki eThekwini, i-ambulensi abehamba ngayo ihlaselwe yizigilamkhuba zayingenela ngamatshe eMtubatuba, ogwini olusenyakatho yeKwaZulu-Natal, umufi walimala kakhulu njengoba ephuke ithambo lehlombe eshaywa yitshe.
Uthathwe wayiswa esibhedlela saKwaMbonambi eMpangeni, enyakatho-mpumalanga yeKwaZulu-Natal wafakwa izitishi. Ususwe lapho washoniswa eNkosi Albert Luthuli. Ubuye wabuyiselwa eMosvold.
Kubikwa ukuthi uze waqala ukunakwa lulunye kuNdasa (March) ngoba esezikhalela. UMnu Mthokozisi Amen Gumbi (23), oyindodana kamufi, uthi bakholwa wukuthi unina ngabe usaphila ukuba ubenakekelwa ngendlela efanele. Uthi bazophoqeleka ukuthathela isibhedlela izinyathelo zomthetho ngoba sehlulekile wukwenza umsebenzi waso. Okubadina kakhulu wukuthi namanje wukuba kayikho imiphumela yokuxilongwa kwesidumbu sikamufi nezithombe ze-X-ray - njengoba elimale ithambo.
“Umama uze washona zingama-25 kuNdasa kophezulu elokhu ekhala ngesibhedlela nezisebenzi zaso, ethi kaziyingeni eyokumelapha zihlanganise ithambo elephuke engozini yeambulensi. Nomshayeli owehlelwe yingozi kabafuni ukusitshela ukuthi ungubani.
“Sihlela ukuphuma inqina sithole abazosimela kule nkinga ngoba sikholwa wukuthi uhulumeni kufanele uqhubeke nokondla izintandane ezishiywe ngumufi.
“Kasinababa kasinamama manje, kulukhuni. Ngeke sivumele ukuxhashazwa ngabantu esikholwa wukuthi yibona okufanele bavikele iziguli. Udaba silubikile eMnyangweni wezeMpilo,” kusho uMnu Gumbi.
Leli phephandaba lizame kaningi ukuxhumana nabaphathi balesi sibhedlela kodwa lutho ukubathola. Izingcingo zabo bezivaliwe.
Okhulumela uMnyango wezeMpilo KwaZulu-Natal, uMnu Agiza Hlongwane, ukuqinisekisile ukungena kwesikhalo somndeni wakwaGumbi ehhovisini labo. Uthe bakwemukele kodwa basephezu kophenyo ukuze kuzocaca ukuthi likhona noma kalikho yini iphutha elenzekile.
Utshele ILANGA ukuthi uma kutholakala ukuthi kukhona ababe nobudedengu, kuyodingeka bashushiswe. “Uma sesiqedile ngophenyo sizobuyisela izimpendulo ezicacile emndenini wakwaGumbi. Nomshayeli owehlelwe yingozi sizomphenya ukuze sithole kabanzi ngakho konke okwenzekile,” kusho uMnu Hlongwane.