IsiseThekwini imashi ka-90% wodumo
ABEZOMTHETHO bathi amaphaphu phansi kubantu baseThekwini abasebenzisa imigwaqo esenkabeni yedolobha njengoba namuhla amaciko ethembise ukugcwala izitaladi, ehambisa izikhalo enhlanganweni yokusakaza kuleli, iSouth African Broadcasting Corporation (SABC).
Ngale mashi efana nse nebiseGoli ngesonto eledlule, amaciko athi ayophikisa isiphakamiso sebhodi yesikhashana sokuqedwa komgomo ka-90% womculo waseNingizimu Afrika odlalwa yimisakazo yeSABC.
Leli bhodi eliqokwe ngoMarch lase linikezwa izinyanga eziyisithupha lithi lo mgomo obekwe nguHlaudi Motsoeneng wodumo udla iSABC izigidi zamarandi.
EGoli bekuphume izinhlangano zomphakathi nezimele amaciko, kulindeleke kwenzeke okufanayo nanamuhla eThekwini.
Ngokusho kwabagqugquzeli, le mashi izoqala enkabeni yeTheku ngo-9 ekuseni eCity Hall ize iyophelela ezindlini zokusakaza kuKE Masinga Road.
Okhulumela amaphoyisa kamasipala iTheku, uSbonelo Wiseman Mchunu, uthi ngeke kubekhona ukuphazamiseka okutheni ngoba abamashayo bazobe benikezwe i- lane eyodwa abazohamba kuyo emgwaqweni baze bayobuthana eSABC.
“Basifakile isicelo semashi. Ingxenye engase ibe nokuphazamiseka kancane yikuwona uKE Masinga emahhovisi eSABC,” usho kanje kafushane.
Amaciko kawafuni nokuyizwa le yaleli bhodi. USekela Sihlalo walo, uMnu Mathatha Tsedu, uthe bahlela ukuqeda ngendaba ka-90% ngoba imisakazo isilahlekelwe cishe ngu-R29m kanti ithelevishini isilahlekelwe cishe ngu-R 183m.
Umyalezo othunyelelwe intatheli nguThokozani "T’zozo" Zulu weCreative Workers Union of South Africa KwaZulu-Natal, uthi kabayile ukuyokweseka uHlaudi noma inhlangano ethile yepolitiki ngale mashi kodwa baya ngezisu zabo.
“Abaculi bethu sebeqalile ukuthola ama- royalty abafanele kanti uma bevala u-90% bazobe beqeda amathuba omsebenzi.
“Kuzokwenzekani ngezingane ezisema- varsity ezenza ezobuciko uma bethi balahlekelwa yimali ekubeni befuna ukuyithumela kwamanye amazwe? Kawukwazi ukubeka umgomo unyaka nje bese ufinyelela esinqumeni sokuthi kawusebenzi. Kawusebenzeli bani?
“Njalo uma iSABC ishoda ngemali iya ephalamende, isizwe ngezimali zabakhokhi bentela. Buka nje uMzansi Magic ukhombisa imisebenzi yakuleli, abantu ababhala imidlalo emifushane bathole imali, siyawuthokozela sonke. Ubuhlungu kubani lo 90%,” kusho uT’zozo.
UMnu Kaizer Kganyago, okhulumela iSABC, uthi nakuba engenalwazi olutheni ngemashi ngoba phela kakuyona eyabo kodwa amahhovisi abo ezindaweni ezahlukene anabo abantu abangamukela i- memorandum.
EThekwini kulindeleke yamukelwe nguZamambo Mkhize oyiRegional Manager kodwa uKganyago uthe unalo (uZamambo) ilungelo lokuthumela ongayemukela uma yena engaphumeleli.