USHENGE UTHI AKADINGE KWETHULWA ENQUTHU
IVEZE ukuthi kayidinge kuchazwa iNkosi Mangosuthu Buthelezi, engumengameli weNkatha Freedom Party, (IFP) ukuze abantu baseNquthu, maphakathi neKwaZulu-Natal bavotele iqembu layo kwazise kuyaziwa ukuthi isebenza ngobuqotho.
INkosi Buthelezi isho la mazwi nje, ngeSonto ivakashela eMkhonjane eNquthu ukuyokhankasela iqembu layo njengoba kuzoba nokhetho lobuholi bukamasipala mhla zingama-24 kwephezulu.
Itshele leli phephandaba ukuthi ukuba lolu khetho beluhlanzekile, ibingasho ingananazi ukuthi iqembu layo lizozidlela amahlanga.
“Besingawudla umhlanganiso kodwa njengoba-ke eNquthu sekugcwala amalunga ekhabhinethi eyoshiya izijumbane zokudla, kakulula. Ngikhuluma nje okhethweni olwedlule amakhansela ethu abenunuselwa ngemali. Abantu baseNquthu bayawazi amagalelo ami, kangiyena umafikizolo khona nasesifundazweni, iqembu lami lisebenza ngobuqotho,” kusho iNkosi Buthelezi.
Ithe nanoma ngubani ononembeza uyazi ukuthi i-IFP isebenza ngobuqotho kusukela (iNkosi Buthelezi) isaphethe uhulumeni waKwaZulu, ewuphathe iminyaka eli-19.
ILANGA likhulume naye esuka emzini kasomabhizinisi owaziwayo KwaNongoma, uMnu Norman “Mnqandi” Bond (89), oshone ngoLwesibili kusihlwa esibhedlela saseRichards Bay.
Uzofihlwa emathuneni aseSheshi, adume ngeleTop Garage, emu kwenkonzo ezoqala ngo-10 ekuseni eLindizwe Stadium.
Ngokuthola kweLANGA, ufe olwembiza umphakathi waKwaNongoma kwazise kuthiwa uMnu Bond obesikhipha ngogovane isiZulu ubewunakekela ngendlela exakile. Lokho kufakazelwe yiyona iNkosi Buthelezi ethi ngendlela abebezwana ngayo noMnu Bond, ubungafunga ukuthi ngabandawonye.
“Sikhule naye KwaDlamahlahla (KwaNongoma), sazana kusukela lapho. Umhlobo wami ubeyisilomo ngisho naseSilweni imbala, enenhliziyo eyisimanga. Ubelekela ezikoleni, emasontweni ngisho kuvele isifo ubesiza,” kusho iNkosi Buthelezi ethi uMnu Bond ubefana nenkosi kubantu bendawo abeyakhele.
Ngokusho kukaMnu George Bond, oyindodana kaMnu Bond, uyise uzofihlwa ngoMgqibelo.
UShenge uya eNquthu nje, umholi weDemocratic Alliance (DA), uMnu Mmusi Maimane, ubekule ndawo izolo ngoLwesithathu naye eyokhankasa. Kuzokhumbuleka ukuthi uMasipala waseNquthu usuphenduke iqatha elicebile nje, emuva kokhetho lohulumeni basekhaya obelumhla zintathu kuNcwaba (August) nyakenye, bekumele uphathwe yi-IFP ngokulekelelwa yi-Economic Freedom Fighters (EFF) neDA kodwa kwaba nezinxushunxushu eziholele ekutheni kuze kuphele izinsuku ezingama-90 ubuholi bungekho, uNgqongqoshe wezokuBusa ngokuBambisana nezoMdabu KwaZulu-Natal, uNkk Nomusa DubeNcube wanquma ukuwuhlakaza - ngokugunyazwa wumthetho.
Nokho amaqembu aphikisayo abelokhu ekhale njalo ngokuthi kunesandla esinoboya odabeni lwaseNquthu esola ukuthi i-African National Congress (ANC) iwufuna ngenkani lo masipala yize ikhale ngaphansi okwentshebe yaKwaMashu okhethweni.
Ukungabikhona kobuholi eNquthu kudale ukuthi nakuMasipala wesiFunda uMzinyathi kube ngesifana-yo. Kube nezinsolo zokuthi lokhu kwenziwa ngoba kunqandwa ukuthi lo masipala - obuphethwe yi-ANC ngaphambi kokhetho lwanyakenye - ungaweli kwelinye iqembu ngoba lizobona amanyala enkohlakalo ebiyenziwa.
Elenkohlakalo eMzinyathi lifakazelwe nguNgqongqoshe DubeNcube esishayamthetho ngeledlule lapho abale khona noMasipala waKwaNongoma - lapho inkohlakalo yenzeke kuwona kusaphethe iNational Freedom Party (NFP).