IMIBUZO NGOKUNGAFIKI KUKANDOBE EMCIMBINI
ZIYAQINA izinsolo zokuthi iSekelanobhala le-African National Congress (ANC) KwaZulu-Natal eliyimeya yaseHarry Gwala, uMnu Mluleki Ndobe, lingomunye wabaholi bakulesi sifundazwe abathwele ngeqoma isekela-mengameli lezwe neANC, uMnu Cyril Ramaphosa, ukuba libe ngumengameli waleli qembu nezwe emuva kukaMnu Jacob Zuma.
I-ANC izoba nengqungquthela yokukhetha ubuholi ngoZibandlela. Kubukeka umjaho wesokwengamela i-ANC uphakathi kukaMnu Ramaphosa noDkt Nkosazana DlaminiZuma obeshade noMengameli Jacob Zuma.
Izinsolo zokweseka uMnu Ramaphosa ziqiniswe nawukuthi uMnu Ndobe akalubhadanga emcimbini obungoMsombuluko eNkwezela, eBulwer, maphakathi neKwaZulu-Natal wokwethulwa ngokusemthethweni kukaMasipala iDr Nkosazana DlaminiZuma, ongaphansi kowaseHarry Gwala.
UMnu Ndobe ubefakiwe ohlelweni lomcimbi ukuba ethule izicukuthwane kodwa zagcina zethulwe ngelinye lamakhansela aseDr Nkosazana Dlamini-Zuma.
Esinye sezakhamizi kulo masipala, uMnu Swelihle Ndlela, sithe ukungabi khona kukaMnu Ndobe kulo mci- mbi kukhombisile ukuthi akamhloniphi umholi obefike esifundeni iHarry Gwala, esho uDkt Dlamini-Zuma.
“UMnu Ndobe ungusokhaya waseHarry Gwala, ungangabikhona kanjani kufike izivakashi emzini wakho? Lokhu akwenzile kubi futhi abanye abantu bazokuthatha ngenye indlela njengoba sekubhekwe kule ngqungquthela ye-ANC yokukhetha ubuholi obusha.
“Noma kuthiwa uNkosazana Dlamini-Zuma akamfuni ukuba abe ngumengameli kodwa kumele angakuvezi obala lokhu manje ngoba yena ungumholi,” kusho uMnu Ndlela.
Eziphendulela uMnu Ndobe, uthe zingamampunge nje lezi zinsolo. Uthe into emenze wangaya emcimbini yingoba ubehambele owe-ANC obuseThekwini.
“Lokhu ngikwenze ngokuvumelana nobuholi obuphezulu. Bengiyile futhi emcimbini wokukhulekelwa kwakhe uDlamini-Zuma obukhona eBulwer ngeSonto. Abantu bayohlale bekhuluma izinto zabo ezingenasidingo,” kusho uMnu Ndobe.