Imeya yaseKZN yeseka uDlamini- Zuma
Ithi bazimisele ukwenza kahle
UKUBEKE emahlombe akhe ukusebenza kukamasipala owethiwe ngegama lakhe, uDkt Nkosazana Dlamini-Zuma oke waba nguSihlalo we-African Union Commission, obewethulwa ngokuse-mthethweni eNkwezela, eBulwer, maphakathi neKwaZulu-Natal ngoMsombuluko.
Ekhuluma emcimbini wokwethulwa kukaMasipala iDr Nkosazana Dlamini-Zuma, uDkt Dlamini-Zuma uthe ngeke umasipala uqanjwe ngegama lakhe bese ewuyekelela nje.
“Ngizoza ngizobheka ukuthi izimali zikamasipala zisebenza kanjani nokuthi amakhansela ayaziyisa yini izidingo emphakathini,” kusho yena.
Lo masipala usunguleke kuhlanganiswa uMasipala iNgwe neKwaSani. IKwaSani ibinama- wadi amane bese kuthi Ingwe ibe nali-11. UDkt Dlamini Zuma uxwayise lo masipala ngokuthi ungenzi into eseke wayibona yenzeka kwabanye omasipala yokuba kushiswe izingqalasizinda uma kubhikishwa.
“Ningathi uma nifuna umtholampilo bese nishisa isikole, leyo nto yimbi ningalinge niyenze la eNkosazana Dlamini-Zuma, niyobe nilihlazile igama likamasipala wenu.
Ukubhikisha kuyilungelo elikumthethosisekelo wezwe kodwa kakukho emthethweni ukushisa impahla kahulumeni. Yicala lelo, otholwe elenza kuyofanele aboshwe ngoba yisigebengu leso,” kusho uDkt Dlamini-Zuma.
Imeya yaseDr Nkosazana Dlamini-Zuma, uNkk Ngeneleni Mncwabe, ithembise ukuthi kawukho unyaka ozodlula bengaziyisanga izidingo emphakathini.
“Kuyangijabulisa ukuthi ngi- ngene kulo masipala izinto zivele zihamba kahle njengoba bobabili (omasipala) abahlanganisiwe bebethole umbiko wezezimali ongenagcobho.
“Namanje sizoqhubeka kanjalo ngoba lo masipala wethu uqanjwe ngomuntu owenza kahle futhi nathi siyaphoqeleka ukwenza kahle,” kusho uNkk Mncwabe.
IMeya yaseBuhlebezwe, uMnu Zamo Nxumalo, ithe igama likaDkt Dlamini-Zuma lihle konke lapho abesebenza khona ubefike enze into ebonakalayo.
Uthe abantu banomazisi abangamakhadi nje, kungenxa yakhe.
“Igama likaNkosazana Dlamini-Zuma yilona elidinga ukuphakanyiswa (ukuba abe ngumengameli), kangazi ukuthi umuntu ongaqhamuka nelinye igama ngabe ulithathephi,” kusho iMeya Nxumalo.