Umculi kamasikandi udutshulwe yisoka likadadewabo
Beliphethe izibhamu ezimbili
USETHUKA izanya umculi kamaskandi osinde ngokulambisa edutshulwa amahlandla amabili yisoka likadadewabo, ekubo nomndeni wakubo ngoLwesihlanu olwedlule.
UNkululeko "Mbhodobhodo" Mdlalose waKwaNibela, eMkhanyakude, enyakatho-mpumalanga yeKwaZulu-Natal, udutshulwe esiswini naseqolo nguMnu Joel Sangweni (42) oyisoka likadadewabo, uNkz Zodwa Mdlalose.
Lokhu kuthiwa kwenzeke emuva kokuba uMnu Sangweni enengwe wukuthi uMbhodobhodo ufaka udadewabo emculweni engakhulumanga naye. UMnu Sangweni kuthiwa ugasele kwaMdlalose ngoLwesihlanu ngezithuba zehora lesi-6 kusihlwa ephethe izibhamu ezimbili wafike wabuza uNkz Mdlalose kumfowabo (uMbhodobhodo) okuthe uma engaveli, wadedela inhlamvu kusibali wakhe ngoba ethi intombi yakhe ifihliwe.
Elandisa leli phephandaba uMbhodobhodo, uthi phambilini uMnu Sangweni uke wakhononda ethi akayifuni le nto yomculo. Uthi amethusile amazwi kaMnu Sangweni ngoba akakaze akhiphe ngisho isipeletu ngodadewabo - akakaze ahlawule ngisho izingane zakhe ezimbili ezizalwa nguNkz Mdlalose.
"Usibali uke wawusabisa umndeni wami kodwa lokho kwabuye kwadlula. Okungixaka kakhulu wukuthi udadewethu wondliwa ekhaya futhi uhlala khona, bona bayahlangana nje ngokuvakashelana njengoba benabantwana othandweni lwabo. Eminyakeni edlule sithathe nezingane zabo sazihambisa kudadewethu ogane eVryheid ngoba sisondezela isikole kwazise bezihamba ibanga elide.
"Ukhonondile nalapho wathi thina sithatha izinqumo ngezingane zakhe yena engazi lutho ekubeni lingekho neqhaza alibambile ekukhuleni kwazo. NgoLwesihlanu kusihlwa utheleke ekhaya waqala waya kumama ongizalayo wathi iphi intombi yakhe, ngaleso sikhathi uZodwa ubesendlini encane.
"Udlulele kimina elawini lami wathi kunomuntu omtshele ukuthi udadewethu ulotsholwa yisiqumama, ngabe kwenzeka kanjani lokho. Ngibuzile kuyena ukuthi ngihlanganaphi mina nalokho, wabe esebuza ukuthi simfihlephi udadewethu, wavulela ngenhlamvu,” kusho uMbhodobhodo.
Uthi okwamanje akakwazi ukuhamba njengoba inhlamvu ingene esiswini yaphuma ngemuva kanti enye ishaye eqolo. Uveze nokuthi ngesikhathi kwenzeka lokhu, yena ubeselele phansi laphinda isoka ladlulela endlini encane lapho udadewethu abesezivalele khona, nakhona lavulela ngenhlamvu kodwa wangalimala (uNkz Mdlalose).
“Laba bantu bathandane ngivele ngicula naye udadewethu, kusukela sisasebenza eqenjini Amambeje Amahle nakuSgwebosentambo, kwaze kwaba sisungula iqembu lethu. Noma ngabe udadewethu ngimthengele izimpahla zokugqoka, kakwehli kahle kusibali,” kusho uMbhodobhodo.
Okhulumela amaphoyisa KwaZulu-Natal, uCapt Nqobile Gwala, uthe kuboshwe umsolwa oneminyaka engama-42 ubudala wavela eNkantolo yeMantshi eMtubatuba ngoMsombuluko. “Amaphoyisa aseHluhluwe ayaluphenya udaba nakuba imiphumela ingakaziwa okwamanje njengoba idokodo lisesenkantolo,” kusho uCapt uGwala.
Kudutshulwa uMbhodobhodo nje, kakukapheli isikhathi esingakanani imboni kamaskandi igutshuzelwe yifu elimnyama ngokudlula emhlabeni kukaMnu Mthokozisi "Salabemkhuluma" Xulu waKwaNongoma odubuleke kusuka udungunyane kwiNqokotho Maskandi Festival, eCurries Fountain Sportsfield, eThekwini.
USalabemkhuluma ubengumlandeli kaMjikijelwa "iChalaha LikaShafuza" Ngubane.