ITHEKU LIZOQHUBEKA NOKUPHATHA INDABA
KULINDELEKE ukuba iTheku lihlomule ngo-R2 billion emkhakheni wezokuvakasha njengoba ngoLwesibili kumenyezelwe ukuthi leli dolobha lisazoqhubeka nokusingatha umbukiso wezokuvakasha omkhulukazi eNingizimu Afrika, iTourim Indaba, iminyaka eyisihlanu.
Lo mbukiso uqale ngoLwesibili kanti uphela namhlanje eNkosi Albert Luthuli International Convention Centre (ICC) eThekwini.
Lo nyaka besekungowama-27 iTheku lisingatha ngempumelelo lo mbukiso ohanjelwa ngabezindaba abaqhamuka emazweni ahlukene.
Kulo nyaka abezindaba abahambele lo mbukiso bangama-300. Ikhuluma neLANGA imenenja yezokuvakasha kuMasipala weTheku, uMnu Phillip Sithole, ithe bajabule kakhulu ukuthi leli dolobha liphinde laqokwa ukuba lisingathe Indaba.
“Lokhu kusho ukuthi amazwe ayasethemba ukusingatha lo mcimbi ngendlela ehloniphekile nehlelekile. Okusijabulisa kakhulu wukuthi amathuba ebesiwathola sisazoqhubeka siwathole. Kule minyaka engama-26 eyedlule sikwazile ukwenza imali elinganiselwa kuR3 billion ngokuba neTourism Indaba.
"Kweyalo nyaka sikwazile ukwenza u-R105 million. UMengameli Jacob Zuma evula ngokusemthethweni lo mbukiso ngoLwesibili, uveze ukuthi umkhakha wezokuvakasha udale amathuba ayi-1.5 million. Imali eyenziwe ngezokuvakasha ngowezi-2015, iwu-R375 billion.
"Le mali sifuna ukuba yenyuke ngo-R2.2 million ngowezi-2026. Iningizimu Afrika sifuma ibe sohlwini lwamazwe ahamba phambili emkhakheni wezokuvakasha.
"Kumanje simatasatasa nezinhlelo zokuba kube nesitimela esizozungeza wonke amazwe ase-Afrika,” kusho uMnu Sithole.
Uthe basazoqhubeka nokubeka iNingizimu Afrika ebalazweni lomhlaba kwazise banesifiso sokuheha izivakashi ezintsha eziyizi-5 million kule minyaka eyisihlanu ezayo.