BADANGELE NGOLWEMFUYO
UZIBOPHEZELE ekutheni uzovakashela indawo okubekwe kuyona izinkomo zabantu ezithathwe nguMnu Lawrens Houston, ongumnikazi wepulazi, iNormardien eliseDannhauser, enyakatho yeKwaZuluNatal, ungqongqoshe wezolimo kulesi sifundazwe, uMnu Themba Mthembu.
UMnu Mthembu ukusho lokhu emuva kokuya eNkantolo eNkulu yeziSebenzi eThekwini ngoMsombuluko lapho bekulindeleke ukuba kuphume isinqumo esiphoqa uMnu Houston ukuba abuyisele lezi zinkomo ezingama-300 ezithathwe kubanikazi bazo ngoba kuthiwa ziqeda utshani epulazini.
Kakuqhubeka ukulalelwa kwaleli cala njengoba abameli bakaMnu Houston befake incwadi yesicelo sokuba kushintshwe ijaji ngoba belisola ngokuchema. Mhla zingama-26 kuNdasa (March) inkantolo ikhiphe isinqumo sokuba uMnu Houston abuyisele izinkomo kubanikazi.
Abantu baphume enkantolo ngoMsombuluko bebhalwe intukuthelo ngenxa yokungaqhubeki kwecala kodwa bagcine sebechazelwa ngummeli wabo, uMnu Sibusiso Jiyane ngokuhlehla kwalo. Okubanenge kakhulu wukuthi basuke kude benethemba lokuthi bazobuyela emuva sebazi ukuthi zibuya nini izinkomo.
Ngesikhathi ekhuluma nabezindaba uMnu Mthembu, uthe basazohlela isikhathi lapho bezovakashela khona le ndawo okugcinwe khona lezi zinkomo ukuyobheka ukuthi zisekhona yini. “Njengoba lezi zinkomo zithathiwe, kubalulekile ukuba zibhekwe ukuthi zisesimeni esihle yini nokuthi zisaphila yini. Uma uthatha inkomo ebihlala epulazini, idla ngokukhululeka uyoyivalela esibayeni, ingagcina ngokufa ngoba kayijwayelanga (ukuhlala ndawonye)," kusho yena.
Ephawula ngesinqumo sabameli bakaMnu Houston, uthe kuyaxaka ukuthi sonke lesi sikhathi bebelindeni bengasifaki lesi sicelo baze bezosifaka ngelanga obekumele ngabe kuphuma ngalo isinqumo. UMnu Lucky Shabalala okhulumela abanikazi bezinkomo, uthi bebekulindele okwenzekile.
"Besazi ukuthi yinto ezokwenzeka, kakusethusi lokhu ngoba bazama ukubambezela icala, akukho okunye,” kusho uMnu Shabalala.