Uphase ngo- distinction abangama-30
Ubelala emtapweni wolwazi ngenxa yokweswela indawo
UGILE izimanga umfundi waseDurban University of Technology (DUT) ethweswa iziqu, uphase ngamalengiso kuzona zonke izifundo zakhe. UMvelo Siyaya (22), waseNkongolwane, eVryheid, enyaka-tho yeKwaZulu-Natal, othole o- distinction abangama-30, ubethweswa iziqu zeNational Diploma kwi-Internal Auditing.
Uchaze ngobunzima abhekane nabo ngesikhathi efuna isikhala sokufunda kule nyuvesi. Uthi ukukhula ehlupheka yikhona okumvule amehlo wasebenza ngawo wonke amandla ukuze ajabulise uninakhulu omkhulise ngemali yempesheni nonina obesebenza kanzima ehlanza igceke efemini, ethola imali engekho ukondla yena nezingane zakwabo njengoba bengaphezulu kwesi-6.
Utshele leli phephandaba ukuthi ngenxa yokubona isimo saku- bo, uzinikele kakhulu.
“Ngesikhathi ngithola umyalezo ovela enyuvesi othi ngiyamukelwa, ngijabule kakhulu kodwa kwasala umbuzo ongaphendulekiothi ngizoyithathaphi imali yokubhalisa kwazise umama ubengenayo. Ngikhumbula kahle ngesikhathi ngisuka ekhaya (ngowezi-2014), bengilangazelele imfundo kuphela.
“Yize beyingekho imali yokubhalisa neyokukhokhela indawo yokulala kodwa ngithathe imithwalo yami nganikela eThekwini ngathi kuyobonakala phambili njengoba bekuyimina owokuqala ngqa ukufunda enyuvesi kithi.
“Ngifike ngingazi muntu nokuthi ngizophuma ngibhekephi. Kungiphoqile ukuba ngilale emtapweni wolwazi wesikole izinsuku ezingaphezulu kweziyisi-8 njengoba bengingakalutholi uxhaso lweNational Student Financial Aid Scheme (NSFAS) okuyimali ebizongikhokhela izindleko,” kusho uMvelo.
Uthi bekuthi uma kufika onogada beyohlola isimo emtapweni wolwazi, abaleke kwazise bekungavumelekile ukuba kulalwe khona. Uveze ukuthi ngesikhathi esafunda esikoleni samabanga aphezulu, uphase ngo-A abane yize ebebhekene nenkinga yokuhlukunyezwa wukubona umndeni wakubo uswele.
Usizi lomndeni wakubo yilona olumenze wanquma ukuba alwele ukuphasa ngamalengiso nasenyuvesi.
“Unyaka nonyaka kule minyaka emithathu bengenza izifundo ezi- li-10 engiziphase ngo- distinction zonke.
Bekungelula neze, kodwa obekwenza ngisebenze kanzima wukuthi uxhaso lwakwaNSFAS belungangikhokheli zonke izindleko zezifundo zami nokwenze ukuba ngikwazi ukuthola eminye imifundaze ngaphakathi ngenxa yakho ukuphasa kahle.
Ngesikhathi ngithatha imithwalo yami ngisuka ekhaya, ngenze isibophezelo kumama ngathi yimina oyoqeda indlala ekhaya.
Ngidele konke empilweni ngabhekana nezincwadi zami,” kusho uMvelo. Uthi njengamanje uqhubeka neBachelor of Technology Degree (BTECH) kuyona i-Internal Auditing.