AMANXEBA ASOPHA KOBEHAMBISE IZIBIZO NGENGOZI YEBHASI
KUQAQAMBA inhliziyo avukwe yisibibithwane owesilisa waseBulwer, maphakathi neKwaZulu-Natal, obeqashe ibhasi eligingqike KwaNtunjambili eNkandla, maphakathi neKwaZuluNatal, labhubhisa inqwaba yabantu ehambise izibizo ekhweni ngenyanga edlule uma echaza ngalolu daba.
UMnu Mbhidi Ngwadi, ongumyeni obeqashe ibhasi, uthi impilo inzima njengoba unina nodadewabo beshone kule ngozi, usesele nabafowabo abane abancane kunaye.
Ekhuluma neLANGA, uthe njalo uma ebuka izingubo zokulala namaphinifa abebeyombesa ngawo ekhweni inhliziyo yakhe ivele ibe buhlungu kakhulu njengoba kufe abantu bethi bazokwandisa amalunga omndeni ngomakoti.
“Noma sesiphindela ekhweni sesihambisa lezi zinto, ngeke kusafana nasekuqaleni umama engasekho. Zintathu kuNhlangulana (June) sizobe sikhumula inzilo ngokuhanjelwa ngumama, yilapho kumele sihlele khona ukuthi sizophinde sizihambise nini lezi zibizo zasekhweni ezigcwele indlu.
“Nalapho kangazi kuzokwenziwanjani ngoba sishonelwe saze sashonelwa nangudadewethu nezinye zezihlobo kule ngozi,” kusho uMnu Ngwadi.
Echaza ngokwenzekile ngosuku lwesigameko, uthi babehamba belindana nebhasi, yena nomzala wakhe behamba ngemoto encane.
Uthi badlule eMgungundlovu bathatha ezinye izihlobo zabo, nazo zangena ebhasini kwaqhutshekwa nohambo, ibhasi lihamba phambili. Sebefika eKranskop ibhasi limile abantu bayozikhulula, kumnandi kuculwa kungekho lutho olusolisayo.
“Sithe uma sisuka lapho mina ngahamba phambili ngoba yimi engazi ekhweni lami, ibhasi belisilandela eduze. Emajikeni aKwaNtunjambili bengithi ngisithela ngilibone seliqhamuka ibhasi kodwa kuleli jika lokugcina ngibone kudlula isikhathi eside lingaqhamuki.
“Ngiqhubekile saze salilinda emgwaqweni ojikela ekhweni. Ngibona kuthatha isikhathi eside lingasaqhamuki ngase ngijika ngithi ngiyolibheka. Kuthe ngisahlehla ngijika, kwangena ucingo lukadedewethu kodwa lushaywa ngomunye wesifazane ethi ibhasi selivelelwe yingozi.
“Uma sifika endaweni yesigameko, ngibone udadewethu ehleli ebhasini kodwa ngangabe ngisakhuluma naye ngoba abantu bebekhala emahlashaneni angezansi becela usizo. Bengilokhu ngibadonsa ngibayisa emgwaqweni, umzala ubematasa efona ukuze kutholakale usizo.
“Ifikile i-ambulensi yabasiza abanye nemoto yezidumbu yafika yathatha abese beshonile. Kule ngozi kushone abantu abali-12 endaweni yesigameko, abathathu bashonela esibhedlela,” kuchaza uMnu Ngwadi.
Okhulumela amaphoyisa KwaZuluNatal uLt Colonel Thulani Zwane uthe akekho osaboshiwe ngalolu daba njengoba kusenziwa uphenyo. Uthi kuzothi uma seluphothuliwe bese udaba luyiswa enkantolo okuyiyona ezonquma ukuthi umshayeli uyaboshwa noma cha.
Emajikeni aKwaNtunjambili bengithi ngisithela ngilibone seliqhamuka.