Sisonga ngesililo isangoma esishiselwe isigodlo
Sibuthe inhlabathi yemilobo
SISONGA ngesililo isangoma saseNgonini kwesakwaMngomezulu, eNgwavuma, enyakatho-mpumalanga yaKwaZulu-Natal, esishiselwe isigodlo saso ngeSonto ebusuku, sithi kasifuni nokuyikhuluma into esehlele, kuphela nje kuzozwakala ngengila sekukhalwa kweminye imizi.
UMnu Abraham Mjericho Gumbi, owaziwa ngokuba nezigubhu ezikhulumayo, uthi kufike izwi ebusuku ngeSonto limyalela ukuba aphumele egcekeni kanti uzohlangatshezwa yikloba lomlilo ebelingacisheki.
Utshele ILANGA ukuba yena akayihambi imizi yabantu futhi akathathi bafazi babantu, enjalo nje akathakathi muntu endaweni, okuyizinto ezingenza ukuba ahlaselwe ngale ndlela.
Engxoxweni yakhe ekhethekile naleli phephandaba, uveze ukuthi akakhathazekile kakhulu ngoba unayo imilobo yezicathulo zomenzi wokubi.
“Kangizenzeli ukuthi kungene kakhulu abantu abazofuna usizo lapha ekhaya kodwa kuthanda idlozi eliphila kimina, uma lingasathandi bazovaleka abantu. Kangiyena umuntu osolekayo ngobubi emphakathini futhi nasebukhosini ngiyasiza lapho ngisuke ngidingeka khona.
“Uma kuhlehlwa ngiyahlehla (ukusebenzela indlunkulu ngaphandle kwenzuzo) njengamanye amadoda asendaweni. Lo muntu oshise isigodlo sami kangimazi ukuthi uqine kangakanani ngoba kukhulu okuzomvelela.
“Ngisalindele ukuthi uzoziveza. Kulungile ngizokwenza konke okusemandleni ukuze kube khona isifundo nakwabanye abasacabanga ukuthi bashise izigodlo zabelaphi bendabuko. Ngiyafunga ngithi lukhulu luyeza luyanyelela koshise isigodlo sami.
“Kangizimisele ngokuxoxa kodwa ngizokhuluma ngezenzo ngoba naye ukhulume ngokwenza,” kusho uMnu Gumbi.
Uthi akalivulanga icala lokushiselwa ngoba uyawethemba amadoda (amadlozi) ahlala kulesi sigodlo.
“Ngiyibuthile inhlabathi yezinyawo lapho kunyathele khona umuntu ongihlukumezile. Ngakhoke kasikho isidingo sokuba ngiyo- vula icala emaphoyiseni kodwa ngethembe izidalwa ezihlala kulesi sigodlo,” kusho uMnu Gumbi.
Lesi sigameko sigxekwe nhlangothi zonke zesizwe sakwaMngomezulu. ILANGA lihoshe umoya othi lesi sigodlo sishiswe ngomunye wabelaphi bendabuko osondelene noMnu Gumbi futhi angamathe nolimi naye.
Kubikwa ukuthi umbango usuke ngemuva kokuba kubonakale ukwenyuka kwezinga lokungena kwabantu ikakhulukazi abasuka ezindaweni ezikude, beyokhendla kulesi sangoma ngoba sigabe ngokuba nezigubhu ezikhininda zonke izindaba.
UMengameli weNgwe Idla Ngamabala, okuyinhlangano ebhekelela abelaphi bendabuko eMkhanyakude, uMnu Joseph “Spokwesomlungu” Ndlazi, uthe kubuhlungu okwehlele uMnu Gumbi.
“Sizwelana naye umfowethu uGumbi ngokumehlele. Lesi sangoma siyilunga lethu ngokuphelele futhi akukho esingakwenzi uma kwenziwa izinto enhlanganweni. Sisazohlanganisa amakhanda sibhunge ngalesi simo ukuze siphume nekhambi lokuba kuqedwe umkhuba wokuhlaselwa kwezigodlo.
“Ukushisa isigodlo kakukhona ukuthi ujezisa umuntu kodwa usuke ushisa amadlozi ahlala lapho ngaphakathi. Kuphambene nomthetho ukuthi ungaba nenkinga nami maqede uyoshisa isigodlo engasinikwa ngabadala bakithi. Lo muntu oshise lesi sigodlo uzidonsele amanzi ngomsele ngoba azomshaya amadlozi akwaGumbi,” kusho uMnu Ndlazi.
Kangimazi ukuthi uqine kangakanani ngoba kukhulu okuzomvelela.