Umnikelo nevangeli
INDABA yemali nomnikelo ezinkonzweni ibukeka ingasoze yaphela kuze kubuye iNkosi uJesu. Ngokudlule sike sakhuluma ngokuthi ingcebo nevangeli kumelene yini na.
Silithintile nephuzu elithi mhlawumbe lo msindo okhona njengamanje, kokunye obuye udale ungabazane ukuthi mbala ngabe zonke izinceku zibiziwe ngempela noma ezinye ubufundisi sekuyithuba nje lokuzicebisa, mhlawumbe ususwa yindlela osetshenziswa ngayo umnikelo.
Siyayeseka indaba yokunikela kwabazalwane ezinkonzweni. Indaba-ke isiyoba kuyona inceku enomthwalo wokwalusa umnikelo nokubona ukuthi wenza lokho oqoqelwa khona, angangeni kuyona mzalwane kuyona.
Lapha sibheka isizathu sokucela nokwamukela iminikelo emabandleni. Incazelo enhle yokucelwa kweminikelo yileyo enikezwa nguMphostoli uPaul encwadini I KwabaseKorinte 9:1-14.
Sizoyicaphuna kabanzi le ndima yeZwi leNkosi ukuze sihlambululane kulolu daba lomnikelo ngoba lona ngokwalo luhle futhi lubusisekile. Inkinga ivela ekusingathweni kwezindaba zokunikela kanjalo nokusetshenziswa kwawo umnikelo njengoba sekushiwo.
Nokho wona ngokwawo uyisiko lenkonzo elihle kakhulu nelifanelekile. Nanamuhla zikhona izinceku ezikulo msebenzi ngoba zibiziwe ngokwempela, ezinye zayeka imisebenzi - eholela kangcono - ezaziyenza ukuze zondle imindeni yazo zalalela iphimbo likaNkulunkulu.
Kwelanamuhla sizozama ukuveza isidingo esisobala somnikelo, kakusiyona indaba yethu ukuthi uye usebenze kanjani emuva kwalokho. Ngeke sijule ngokuthi ungenye yezindlela zokudumisa uNkulunkulu. Amazwi esizowacaphuna njengalokhu enjalo eBhayibhelini, ayimpendulo enhle ngenceku ekusebenza kwayo kungasoleki ndawo kulo mbandela wokuphathwa kweminikelo.
Asiyibukeni le ngxenye yeZwi leNkosi njengempendulo kumfundisi odele konke wemukela ubizo kodwa enesidingo naye sokondla izingane zakhe.
Nanko-ke amazwi ayichaza kahle le ndaba: “Angikhululekile na? Angisiye umphostoli na? Angimbonanga uJesu iNkosi yethu na? Nina anisiwo umsebenzi wami eNkosini na? Noma ngingesiye umphostoli kwabanye, nokho kinina nginguye, ngokuba uphawu lobuphostoli bami eNkosini yinina.
“Lokhu kuwukuziphendulela kwami kwabangisolayo. Asinalungelo yini lokudla nokuphuza na? Asinalungelo yini lokuhamba nomzalwanekazi ongumkethu njengabanye abaphostoli, nabafowabo beNkosi noKhefase na?
“Yimi kuphela noBarnaba esingenalungelo lokuyeka ukusebenza na? Ngubani oke aye empini ngezakhe izindleko na? Ngubani otshala isivini angazidli izithelo zaso na? Ngubani owalusa umhlambi angadli ubisi lomhlambi na? Lokho ngikusho ngokwa- bantu nje na? Ngokuba kulotshiwe emthethweni kaMose ukuthi: 'Ungayifaki inkabi isifonyo nxa ibhula amabele. Konje uNkulunkulu ukhathalela izinkabi na? Noma ukusho ngenxa yethu impela na? Yebo, kwalotshwa ngenxa yethu ngokuba olimayo kufanele alime enethemba, nobhulayo abhule enethemba lokwabelwa naye. Uma thina sihlwanyele kini okomoya, kuyinto enkulu yini uma sizovuna okwenyama na?'
“Uma abanye behlanganyela lawo mandla phezu kwenu, kungebe yithi kakhulu na? Nokho asilisebenzisanga lelo gunya kepha sibekezela ngakho konke, ukuze singalithiyi ivangeli likaKristu. Anazi yini ukuthi abaphethe imisebenzi yethempeli badla okwethempeli nokuthi abakhonza e- althare bahlanganyela ne- althare na?
“Ngokunjalo iNkosi imisile ukuba abamemezela ivangeli baphile ngevangeli."
Icaciswe kahle yonke indaba lapha, ngisho nokusebenzela iNko- si ngokugcwele (ivesi 6) nokuthi umfundisi uthola isabelo (ivesi 10), okungasho khona ukusebenzisa wonke umnikelo ezidingweni zakhe luqobo.