KUNABANTU ABALETHWA NGUNKULUNKULU KUWENA BABUYE BASUSWE NGUYENA
IZENZO 8:27-39
NAMUHLA ngithanda ukusiza abantu abanezinto abazenziswa nguNkulunkulu ngokuthi nakuba kunjalo kodwa kunesikhathi lapho ake akunike umuntu ozokusiza entweni ethile, okuthi uma eseqedile kuphinde kube nguyena uNkulunkulu omsusayo kuwena.
Kule ncwadi esifunda kuyona, sicaciselwa ngomuntu obizwa ngomthenwa owayegibele enqoleni eya ndawana thile. Kule nqola le ndoda yayifunda incwadi eyayingayiqondi ukuthi ithini.
UMoya oNgcwele waholela uFiliphu kuyona ukuba ayisize, ayambulele ngencwadi eyabe iyifunda. Okufanele ukuba sikufunde kule ndaba wukuthi kunezinto uFiliphu ayethunywe zona okwathi eseqedile ukuzenza wasuswa nguMoya oNgcwele eduze kukamthenwa.
Zimbili izinto ezigqamayo ezaziyiswe nguFiliphu kumthenwa.
Eyokuqala, wukucacisa into eye- nziwa ngumthenwa ukuba ibonakale ngokucacileyo bese kusizakala yena uqobo.
Okwesibili, okuvelayo wukuthi kwathi esecaciselekile umthenwa wabe esecela ukubhabhadiswa nguyena uFiliphu.
Emuva kokubhabhadiswa kukamthenwa, kwabe sekuba wukuphela komsebenzi kaFiliphu. Yingakho iBhayibheli lithi emuva kwalokho wabe esesuswa nguMoya oNgcwele okunguyena owayemthumele kumthenwa.
Qaphela ukuthi uma uNkulunkulu ekuphathise umbono othile, kuba khona izinhlobonhlobo zabantu abathumela kuwena ngezizathu ezahlukene, okumele uzazi ukuze ungabi nenkinga uma abanye sebehamba.
Umbono nombono uba nabantu abathunyelwa nguNkulunkulu kuwona, noma sekunezimpi zawo kodwa bahlale ngoba bona bathunyelelwe ukuyohlala kuwona.
Kuyasidala isiphithiphithi ukugodla umuntu oseyiqedile into abeyithunyelwe kuwena.
Kufanele sifunde isifundo kuNkulunkulu uqobo ukuthi indlela ayisebenzisa mhlazana esenzela umsebenzi wensindiso - ukuthi nakuba kunguyena ongumnikazi wokusindiswa kwethu - kodwa kunengxenye eyayidinga ukuba kusetshenziswe ubuNkulunkulu bukaJesu ukusindisa abantu emhlabeni.
Kunamazwi akhulunywa nguJesu ekusetshenzisweni kwakhe kuleli cebo lensindiso.
Lawo mazwi athi: “Kumele ukuba ngihambe ukuze nginithumele umduduzi uMoya oNgcwele ozoza kini aniholele kulo lonke iqiniso.” Ngamanye amazwi ukuhamba kukaJesu yikhona okwaveza ithuba lokuba kuze uMoya oNgcwele phakathi kwethu.
Kufanele sikuqaphele kakhulu ukuthi emuva kokuba uJesu esewenzile umsebenzi wensindiso ayewuzele emhlabeni, kwadingeka ahambe abuyele ezulwini ukuze ithuba lithathwe nguMoya oNgcwele kithi emhlabeni.
Qaphela, uma kufika lapho ibandla noma abantu abalisebenzayo sebebanga ukulisebenza, kusuke sekuwuphawu lokuthi sekukhona asebephelelwe wumsebenzi osekufanele ukuba badedele abanye basebenze esikhundleni sabo.
Kufanele badedelwe bahambe abantu asebeqede into abebeyizele uma kungesibona abalethelwe ukuzohlala embonweni ngoba yikhona okudala izimpi ezingenasidingo ebandleni.
Kukhona nohlobo oluthunyelwa ukuyofunda izinto ezithile embonweni bese luhamba.