UMPHAKATHI MAWULONDOLOZE AMAN
ESIKHATHINI esiphila kusona sivame ukunqwamana nezimo ezididisayo, ikakhulukazi uma kukhulunywa ngesimo sezulu.
Kakuselula ukuqonda ukuthi kumele silindele ukushisa, amakhaza nozamcolo nini khona enyakeni. Noma kungaze kube njalo-ke, into engashintshi elindeleke kubalimi, wukukhuthala ekuvuneni nasekongeni amanzi.
Yingakho eziqeshini ebesicobelelana kuzona nyakenye besilokhu sigcizelela ukwenziwa kwamakhontolo okubamba amanzi emvula angagobhozi ngesivinini esiphezulu nokusetshenziswa kwamabi- bi nezibola emasimini ukumboza umhlabathi ngoba ngaleyo ndlela umswakama uyongeka ungahwanyukiswa yilanga nemimoya. Angithi phela kamuva nje, kufike kune imvula eningi bese kulandela imimoya emikhulu evela eningizimu ishosholoza ngesivinini.
Ziningi izindlela zokuvuna nokunqoloba amanzi, sizokhumbuza umlimi ngalezo ezimbalwa ezijwayelekile. Amanzi emvula amsulwa, kawathakwe ngalutho olungabeka impilo yabantu nezitshalo engcupheni. Njengazo zonke izimila nezivuno zezitshalo, amanzi siyakwazi ukuwavuna siwafake ezinqolobaneni.
Izinqolobane zamanzi ziyahluka kuye ngamandla omlimi. Indlela ejwayelekile yilena yokufaka ogadasi endlini bese amanzi engena ethangini elimi eceleni kwendlu. Mina ngibona kumele kube yicala ukwakha indlu engenawo ugadasi oqoqa amanzi emvula ophahleni lwendlu.
Noma ngabe indlu isesabelweni noma esilungwini, isikhathi esiphila kusona kasisavumi ukuba sibe budedengu ngamanzi. Kwesinye isikhathi amanzi aqoqelwa emiphongolweni