UZONGCWATSHWA NABO LO MSAKAZO UMA BENGAPHAPHAMI
NJENGAMANJE sengingasho ngithi iMetro FM ifana nesiguli esidinga ukwelashwa ngokukhulu ukushesha.
Lesi siguli selokhu silale phansi ngo-April (Mbasa) kwenziwa izinguquko njengoba sekuwumlando ukushiywa kwaso yizingqwele zabasakazi. Kubukeka sengathi abazali baso nokuyimanagement kulokhu, yikhani bephaphama manje.
Ngisho ngoba ngesikhathi belaxazwa yilezi zingqwele kakuzange kucace ukuthi banawo na u- plan B. USibongile Mtyali onguMphathi siteshi, uyongena komubi umlando njengomuntu isiteshi ebesenza kahle kangaka kodwa sase sifela ezandleni zakhe.
Siyakuqonda ukuthi ziningi izinkinga kwiSABC nezithinta nezimali, nokuzoba nomthelela ekutholakaleni kuka- creme dela creme wabasakazi kodwa imali kayisikhona konke kulo mkhakha. Abasakazi bazi kahle ukuthi ngokunikezwa nje ithuba lokuba yingxenye yeMetro FM kusho ukuvuleka kweminingi iminyango, neyethelevishini imbala uma ubuso buvuma.
Izinkinga-ke zale nhlangano zemali kangikholwa wukuthi yizo eziphambili ekungacacisini kwabaphathi ngo- plan B wabo. Kakulula vele ukuba bonke abasakazi bayikhe ngamafosholo imali njengoba kuthiwa bekwenzeka koTbo Touch, Glen Lewis nabanye.
Phela kakukaze kuholwe imali efanayo eziteshini ezenza inzuzo njengoba kwenzeka kwezinye eziholela imali efanayo i- shift ne- shift.
Kulezi ezenza inzuzo kuhamba phambili ukuthi imi kuphi i- profile yakho, sizuza abalaleli nezikhangiso ezingaki isiteshi ngokuba khona kwakho?
Ngale nje komsakazo kumele i- profile igcwale mikithi, kucace ukuthi unenqwaba yabalandeli nabazogcina phela bengabalandeli bomsakazo. Umsakazo ukufanisa nemayini, uma unabalandeli abaningi ezinkundleni ezahlukene nokusho ukuthi uzodla kahle.
IMetro FM njengoba nakulezi zinsuku iqhosha ngokuvotelwa ngokuba yi- coolest radio station, kumele nabasakazi babhalwe khona lokho, to be cool. Kubukeka sengathi sebethathe umkhuba omusha-ke manje wokungazihluphi ngokusazisa singabalaleli uma sebelande umsakazi omusha. Zolo lokhu ngizwe sekubhavumuluka uMo G emsakazweni ngempelasonto.
Thina esisebenza emkhakheni wezindaba, ngokujwayelekile bayaye basithumelele izaziso ukuze sizidlulisele kubalandeli kodwa kulokhu hhayi khona, sizwe ngembodlongo nje isibhonga ngoMgqibelo ekuseni ohlelweni iThe Weekender.
UMo G (Mpho Madise) akalona ivukana kodwa uyaqala ukuba semsakazweni owenza inzuzo nosakazela izwe lonke.
Ufika eMetro FM nje, usedlule kwiKaya FM, kwiHighveld Stereo neRadio 2000.
Uzwakala nasolimini ukuthi akayifaseli uplaki le nto ayenzayo. Ngizwe futhi ngandlebenye ukuthi uMsizi Shembe obekwiVuma FM naye usengene eMetro FM.
Masethembe ukuthi la masosha abawalandayo akulungele ukuphatha uhlobo “lwesibhamu nezinhlamvu” okudingwa yiMetro FM, kungenjalo sizowungcwaba bephakathi lo msakazo.