KUZOQWASHISWA ABAFUNDI NGOKUZIPHATHA NANGEZIFO EZIBULALAYO
UKUQHUBEKA kokubhebhetheka kwengculaza okuyisifo esesiqede izwe ikakhulukazi intsha sekubuyise uhlelo olwaziwa nge-AIDSWIZE oluhambela izikhungo zemfundo ephakeme ngenhloso yokuqwashisa intsha.
Nakuba sebebaningi abaqhubeka baphile negciwane lesandulela ngculaza kodwa ucwaningo luveza ukuthi basebaningi abathelelekayo, ikakhulukazi intsha.
Ngalolu hlelo kuzanywa ngokusetshenziswa kwamaciko ukunqanda ukutheleleka kwentsha ngesandulela ngculaza neTB.
Kulokhu kuzohlomula abafundi baseCoastal KZN TVET College, eMlazi kwaV, eningizimu yeTheku kusasa ngoLwesihlanu ziyi-19.
Zintathu izinto eziqhakanjiswa kakhulu kulo mkhankaso wukungazibandakanyi ocansini, ukusebenzisa amakhondomu nokwazi isimo okuso ngempilo.
Phakathi kwabazonandisa nguMaraza wodumo lweGWAN nongumethuli wezinhlelo kwithelevishini, yimbongi yodumo elingisa nakwiSibaya uSbo Da Poet, uSparks Bantwana, Benny Maverick noDJ Facebook. Phambilini lo mkhankaso uhambele nakwezinye izifundazwe.
Kulokhu bazogxila ekunikezeleni ngamakhondomu abesilisa nabesifazane, wukuqwashisa ngezifo ezithathelanayo nokukhulelwa, wukugqugquzela ukusoka, wukusetshen- ziswa kotshwala nezinye izidakamizwa, wukufundisa ngamalungelo abathandana nobulili obubodwa nokunye okuningi. UMnu Leonard Mbokazi oyiMeneja yophiko olubhekelele ezomphakathi kwaMondi nabangabanye babaxhasi balolu hlelo uthi: “Lolu hlelo lukhuluma ngqo nentsha esisondele ekubeni ngabaqashwa ezimbonini. Iningi intsha esilahlekelayo ngenxa yenkululeko eyijabulela uma ifika ezikhungweni zemfundo ephakeme bengasekho abazali. Igcina ikhohlwa wukuthi i-AIDS iyabulala kanti thina siyayidinga, siyidinga iphila,” kuphawula uMbokazi.
zowakha@ ilanganews. co.za