KUZOHLOMULA INQWABA KWI-AFRICAN RENAISSANCE FESTIVAL
KULINDELEKE zisine zidedelane, zithokozisa umphakathi izihlabani ezintathu kwikhonsathi yaminyaka yonke i-Africa Day Concert ezobe iseNkosi Albert Luthuli International Convention Centre (ICC), eThekwini.
Le khonsathi ihambisana ne- festival yaminyaka yonke yokugqugquzela ukuzalwa kabusha kweAfrika, nokuziqhayisa kwama-Afrika, ebizwa ngokuthi yi-African Renaissance Festival eba ngoNhlaba (May).
UNhlaba futhi yinyanga ebizwa ngokuthi yi-Africa Month, okuhloswe ngayo khona belu ukuzigqaja ngobu-Afrika nokugqugquzela ubumbano. Sekuphele iminyaka eyi-19 yasungulwa le festival.
Kuhlelwe nengqungquthela ezodonsa izinsuku ezimbili, eyingxenye yale festival. Le ngqungquthela izodonsa kusukela zingama-25 ivalwe zingama-26. Okuzodingidwa kakhulu kule ngqungquthela ngezimayelana nokuthuthukiswa kwamabhizinisi.
Phakathi kwezikhulumi ezizobe ziyingxenye yayo nguMnu Sihle Zikalala onguNgqongqoshe WezokuThuthukiswa koMnotho, ezokuVakasha nezeMvelo; nguNkz Gugu Mjadu oyi-Executive GM Marketing Business Partners; Mnu Calvin Mathibeli weCalvin & Family Group, Rapelang Rabana oyiFounder & CEO: Rekindle Learning; Ntuthuko Shezi oyiFounder & CEO: Livestock Wealth; Siboniso Mhlongo oyi-Exec Director: Iqhina Consulting Eng & Project Managers; Hlubi Mboya Arnold oyiCo-host kwi CliffCentral, Naipaul Khamal we-Adlife Holdings; noLunga Ntuli oyi-Entrepreneur futhi owumbhali wezemidlalo.
Ngokwe-KZN Top Business, uSihlalo wekomidi elengamele i-African Renaissance, uProf Sihawu Ngubane, uthi osomabhizinisi yibona abayisihluthulelo ezinkinge- ni zomnotho nenhlalakahle yabantu e-Africa. Uthi lokhu kulekelela ekuthuthukiseni nasekwenzeni ngcono impilo yabakuleli. Uqhuba athi nakuba abanye bekwazi ukubisha baphinde bazikhulule kodwa abanye badinga ukukhonjiswa indlela ukuze babone amathuba amasha.
Nabafundi ngeke basale ngaphandle njengoba bezochazeleka ngamathuba abanawo okushintshana nabafundi bakwamanye amazwe.
Lolu hlelo lwethulwe ngonyaka odlule. Imininingwane ngala mathuba, nama-bursary iyatholakala ku- www.kznyis.gov.za.
Nomculi uLira ongagcini nje ngokuba ngumculi kodwa odedela isibhaxu ngezinkulumo ezakhayo uzokwethula inkulumo. Amathikithi ekhonsathi yokuvala ayatholakala e-computicket kanti kuzosina kudedelane u-A.K.A, Nasty C noNaima Kay.