EZESIMANJE:
KUQUBUKE omkhulu umsindo ezinkundleni zokuxhumana ngeledlule ngesikhathi ku-trend(a) i-hashtag ethi #MenAreTrash.
Cishe wonke amadoda azizwe ecinzelwa ngale hashtag, kwagcina sekusuka enkulu impikiswano. Abanye bekungathi sebelindele impi ngesikhwili nesihlangu ngoba bebona sengathi kungcofwa bona. Kukhona abebezipholele, bebukela ezi- nkundleni kuphoswana ngamazwi, ubungaze ufunge ukuthi babukela ifilimu - bese kushoda u-popcorn kuphela. Abanye babone kungcono ukuba babe yizishoshovu, balwe nokubizwa kwabanye ngengama likavucu.
Le hashtag iqubuke ngemuva kokuba kuvele izindaba ezishaqisayo zokubulawa ngesihluku esinyantisayo kwentokazi esencane ogama layo nguKarabo Mokoena, okusolwa ukuthi ibulawe yisoka layo, layishisa.
Iningi belibabaza isihluku salowo owenze lesi senzo, lizibuza liziphendula ukuthi intokazi enhle kangaka ibiyenzeni ukuba ize ibulawe ngale ndlela.
Zivamisile-ke izigameko zokuhlukunyezwa kwabantu besifazane, behlukunyezwa ngabantu abathandana nabo. Ngokombiko weMedical Research Council, njalo emahoreni angu-8 owesifazane ufela ezandleni zomuntu athandana naye eNingizimu Africa. * Ukuhlukumezeka kwabesifazane ngabathandana nabo kudla lubi kuleli futhi yikho okuyimbangela ehamba phambili yokufa kwabo.
* INingizimu Afrika ihamba phambili ngezibalo zabesifazane ababulawa ngabathandana nabo uma iqhathaniswa namanye amazwe. * Abahlukumezekile baba mathintanyawo ukubika ngokuhlukumezeka kwabo ngoba izisebenzi zikahulumeni kazibakholwa, kwesinye isikhathi kuphikwe nokuthi umuntu uke wahlukumezeka.
* Bangu- 36-40% abakhulelwe abazithola behlukumezeka ngokwenyama bese kuthi u-15% kuya ku-19 % uhlukumezeka ngokocansi. Kuwo wonke lo msindo okhona amadoda aqotho avelile, echaza ukuthi le hashtag ivela kuphi, kodwa amanye avele akhetha ukuzivikela ngoba engafuni ukuba abizwe nge-trash.
Abanye besilisa ngesikhathi bezivikela babuze abesifazane ukuthi uma bebala ovucu bamadoda kungabe bahlanganisa oyise ababazalayo nezinqandamathe zabo yini.
Okubalulwe ngabanye besilisa wukuthi indaba yokuhlumezeka kwabesifazane yinto ebinyathelwa isikhathi esiningi futhi ebithathwa njengento eyihlazo. Bekungelula ukuba umuntu aphumele obala ngokuthi ushaywa yindoda, ikakhulukazi kwabashadile bekulindeleke ukuba umuntu angene ekamelweni avale umnyango, alungise izindaba zomuzi wakhe.
Abanye bethu bayazi ukuthi bakhule benoyise abashaya onina kodwa yize kunjalo emuva kwale hashtag abanye basamile ezwini lokuthi amadoda kawasiwo uvucu. Kwesinye isikhathi bekungabi wukuthi owesilisa ubeka owesifazane isandla kodwa bekuba nokuhlukumezeka ngokomphefumulo.
Ezinye zezincazelo zabanye besilisa ngale hashtag bezithi amadoda awovucu ngoba asonga izandla angenzi lutho lapho kudlwengulwa owesifazane - esikhundleni salokho abuze ukuthi ubegqokeleni into emfushane? Ubehambelani ebusuku?
Kuthiwa-ke uwuvucu owesilisa ongasebenzisi amandla akhe ukuvikela owesifazane, othula du abukele kuthukwa owesifazane ngoba nakhu engavumanga ukweshelwa.
Nomalume abatshela ingane ukuthi ithule emuva kokuba idlwengulwe yilungu lomndeni noma bamukele imali yokuhlawula, begeza umuzi nabo kuthiwa bawuvucu.
Kweminye yemibono kukhona othe uma kuthiwa #MenAreTrash naye uzibala lapho yize engakaze adlwengule, ahlukumeze ngokwamagama owesifazane.
Uthe uyawunakekela umndeni wakhe nezingane ngoba kuwumsebenzi wendoda lokho. Uqhube wathi amadoda alungileyo kumele azibuze ukuthi yini ayenzayo ukusiza abesifazane abahlukumezekayo, wathi ukuphuma phambili uqhoshe ngokuthi uyindoda elungile kakusizi muntu (uma ungabavikeli ababuthaka).
Uphonsele amadoda inselelo yokuba ame qekelele, alwe nokuhlukunyezwa kwabesifazane.
Wenze isibonelo ngokuthi abesifazane kabazidlwenguli kodwa ngamadoda okumele ahlukane nokudlwengula. Abadlwenguli ngabantu abaziwayo abakhona emindenini nakomakhelwane. Kumele babandlululwe emphakathini ukuze babone ubuhle bokuba yindoda eqotho.
Kuyinto eyaziwayo ukuthi amadoda nawo ayahlukumezeka kwesinye isikhathi. Kodwa lokhu kakusho ukuthi uma abesifazane bephumela obala ngalezi zenzo amadoda kumele abone sengathi kuyadlalwa.
Kuneqeqebana ebelilokhu libhala ukuthi “Not All Men Are Trash” ngesikhathi iqhubeka i-trend (er) le hashtag.
Okuhle ngalesi hashtag wukuthi iveze okuningi ngokuhlukunyezwa kwabesifazane nemicabango yabesilisa. Ngaphezu kwalokho kuyithemba labaningi ukuthi ngelinye ilanga abesifazane bayokwazi ukuba bahlale ngokuthula. Ukuhlukunyezwa kwabesifazane yinto okudingeka kuqwashiswe ngayo nsuku zonke kanti nabo abesifazane kumele baphumele obala ngezimo ababhekene nazo ukuze basizakale kusenesikhathi.