BAZIKHULULA EMAHLATHINI AMATHOYILETHI EXATHUKA
BUDIDA impukane ubunuku esakhiweni soMnyango wezokuThuthukiswa koMphakathi esiseNgwavuma, enyakatho-mpumalanga yeKwaZulu-Natal, okwenza abantu abasuke beye kusona bahlale bebitoza ngenxa yephuma eligqashula ikhanda.
Kulesi sakhiwo kunamahhovisi eSouth African Social Security Agency (Sassa). ILANGA liyile kulesi sakhiwo okuthe lingakangeni ngaphakathi lahlangatshezwa yiphunga lendle nomchamo. Izindlu zangasese zigcwele, babodwa abavele baquluse obala bazikhulule - kungakhathalekile ukuthi ngowesifazane noma ngowesilisa.
Lokhu bakwenza ngisho kukhona abobulili obungafani nobabo. Uma abantu bengena ezindlini zangasese kudingeka beqe indle. “Owesilisa nowesifazane kabasahloniphani. Iziphathimandla zalesi sikhungo zazi kahle ukuthi le ndawo isetshenziswa ngabantu abaningi kodwa basifunza indle.
"Ingani phela bona bangena ngezimoto eziphephetha umoya maqede bayohlala emahhovisi bapheshethwe wumoya. Sizophoqeleka ukugxoba itoyitoyi ukuze kulungiswe indaba yala manyala esifunzwa wona. Kudala siyikhuluma le nto kodwa singanakwa. Wunyaka wesithathu lona kugcwele indle esikhungweni.
"Ngiyazibuza ukuthi abahloli besikhungo babhala imibiko ethini ngasohlangothini lwenhlanzeko. Ibuhlungu impilo ephilwa ngabantu baseNgwavuma. Lapha kusizakala izizwe zamakhosi amathathu okunguNyawo, uMngomezulu noMathenjwa,” kubhoka elinye ilunga lomphakathi elicele ukungadalulwa.
Umthombo ongaphakathi kulesi sikhungo - ongunogada ngokomsebenzi - uthi bathwala kanzima ngoba bahlala futhi basebenzela khona. “Njengoba uyibona le migqomo igcwele udoti, kayichithwa. Uyazibonela nawe ukuthi akuyona indawo yokusiza lena kodwa ngeyokubulala abantu.
"Lokhu sikusho ngoba abantu bafika bephila kodwa babuyele emuva sebehlaselwe yizifo zofuba, ikhorela nokunye okudalwa yi- phunga elibi lendle. Singathokoza uma kungagasela izikhulu zomnyango zizobona lolu sizi olubhekene nalo mphakathi.
"Nabezempilo bayafika lapha kodwa kabasho lutho. Izisebenzi ziphoqeleka ukuyoqulusa emahlathini ukuze zikwazi ukuzikhulula. Abanye bathatha ucingo balubeke endlebeni kube sengathi kukhona abamfonelayo kanti bayozikhulula ehlathini, nalo elikude kakhulu nesikhungo.
"Kudala sikhala ngale nkinga kodwa lutho ukusizakala. Ngomunye unyaka basilethela izindlu zangasese ezingomahambanendlwana babuye bazithatha. Abanezimoto bahamba bayozikhulula ngaphandle,” kusho lo nogada.
UNkk Ncumisa Ndelu, okhulumela uMnyango wezokuThuthukiswa koMphakathi KwaZulu-Natal, uthe unxusa umphakathi ukuba ubekezele kancane ngoba umnyango uphezu kwezinhlelo zokulungisa isimo nendlela okufanele kusebenze ngayo izindlu zangasese. Uthe bafaka izindlu zangasese zesikhashana besiza umphakathi.
“Inkinga siyayilungisa, sicela umphakathi ubekezele ngoba kunezinhlelo esiphezu kwazo. Ngicabanga ukuthi inkinga idalwe wukuthi inkampani eqashisa ngezindlu zangasese zesikhashana isibuye yazithatha yangabe isazibuyisela,” kusho yena.