Bazoyikha ngamafosholo kwekaSangweni
Kuzoba nohlelo lokuhlomisa abafundi
IZOKHIWA ngamafosholo imali kwiSiyabonga Sangweni Tournament and Youth Celebration eqala mhla zinga-23 isongwe zingama-25 kuNhlangulana (June) eDondotha Sports Ground, kwesaKwaMthethwa eMpangeni.
Miningi imidlalo ezokuba yingxenye yalo mqhudelwano. Nokho imiklomelo esadaluliwe ngekanobhutshuzwayo. Ikilabhu ezo-nqoba izogoduka no-R20 000, inkomishi, ijezi nezindondo zegolide kuthi ehlulwe kowamanqamu ihlomule ngo-R10 000, ijezi nezindondo zesiliva. Ezolala isithathu izogi-xabezwa ngo-R7000 kuthi isine sithole u-R5000. NgoLwesihlanu kuzokuba nohlelo lokuhlomisa abafundi ngemikhakha yemfundo abangayithatha ezikhungweni zemfundo ephakeme. Ngakusasa ngoMgqibelo kuzokuba nombukiso wengqephu nomcimbi wobumnandi okuzonandisa kuwona abaculi abehlukene.
USmanga Mgenge oyiMeya yaseMfolozi eyingxenye enkulu yalo mqhudelwano, uthi ngeke bamenywe abaculi abaklwebhanayo. Uthe bahlale bemema abaculi bakamasikandi abahlukene kodwa kulo nyaka ngeke babizwe nhlobo labo abanabalandeli ababuye basuse uthuthuva emicimbini.
Le midlalo iqondene nomdlalo wama-nqamu weNedbank Cup ozokuba seMoses Mabhida Stadium mhla zingama-24 ku-Nhlangulana.
Amakilabhu azodudulana kowamanqamu azokhishwa kule mpelasonto njengoba kunemidlalo yamasemi final. IChippa United izokwamukela iSuperSport United eMonti ngoMgqibelo bese kuthi ngeSonto iLamontville Golden Arrows idudulane ne-Orlando Pirates ePrincess Magogo Stadium, KwaMashu.