Kuboshelwe namakilabhu amasha kwi-Durban U/19
UBOPHELE amakilabhu amasha umqhudelwano iDurban U/19 International Tournament othulwe ngokusemthethweni izolo ngoLwesithathu enxanxatheleni yezitolo iMega City, eMlazi.
Lo mqhudelwano uzoqala mhla zingama-27 kuNtulikazi (July) usongwe ziyisi-5 kuNcwaba (August) eKing Zwelithini, eSugar Ray naseMoses Mabhida Stadium ngokwa-hlukana. Phakathi kwa- makilabhu azokube eqala ukuba yingxenye yalo mqhudelwano kukhona iDeportivo de La Coruna yaseSpain neFC Midtylland yaseDenmark okulindeleke ukuba kunyuse isa-sasa lawo.
La makilabhu azokube ebanga isicoco ne-Asec Mimosa yase-Ivory Coast, yiBenfica FC yasePortugal, yiFlamengo FC yaseBrazil, bese kuba ngamaqembu akuleli iMaritzburg United , iKZN Academy neSA U/19.
UCarlos Catalino ongomunye wabagqugquzeli balo mqhudelwano, utshele ILANGA ukuthi bajabule kakhulu ngempumelelo yalo mqhudelwano okuhloswe ngawo ukuvundulula nokuthuthukisa amakhono entsheni yaseNingizimu Afrika.
Uthi babheke ukwenyusa isibalo samakilabhu azokuba yingxenye yalo mqhudelwano ngonyaka ozayo.
“Sihlela ukuthi ngonyaka ozayo sinike ithuba izingane eziningana ezizalwe ngowezi-2001. Nakulo nyaka bakhona abadlali abathathu abazalwe ngowezi-2001 (U/16). Lokhu sibheke ukuba kuwudlondlobalise lo mqhudelwano futhi kuvulele abaningi ithuba lokuzibonakalisa besebancane.
“Cishe ngonyaka owodwa sihlola abadlali abalinganiselwa kwizi4 000. UThabo Cele ungomunye wabadlali asebegijima phesheya kwezilwandle abavundululwe yilo mqhudelwano,” kusho uCatalino odabuka ePortugal.
Phakathi kwabadlali abaphuma kulo mqhudelwano kukhona uSiphephelo Sithole osemenywe yiBenfica FC lapho kugijima khona uLuther Singh odlala nakumaJita (SA U/20). Lo mdlali ubizwe nayi-Arsenal yase-England kanti kumanje umatasa uzama ukuthola imvume yokuphuma kuleli.
Uthi basazobheka kahle ukuthi yiyiphi ikilabhu azongena kuyona khaxa uSithole. Kuqokwe uDelron Buckley ukuba yinxusa lalo mqhudelwano.