Bancamela ukuvika izembe kunendebe
UMasuku ukhathazekile ngesimo seChippa United
KABASENANDABA nesicoco seNedbank Cup abadlali beChippa United esengcupheni yokugencwa yizembe kwi-Absa Premiership.
IChippa eholwa nguSiviwe “Chippa” Mpengesi izodudulana neSuperSport United kwi- semi final yokuqala ngoMgqibelo ngo15h00 eSisa Dukashe Stadium, eMonti. Lo mdlalo ufika nje, iSuperSport iyayidinga le nkomishi njengoba isiphumile embangweni wesicoco seligi.
Yiyona esifuna ukuzithoba ngayo izinhliziyo.
OkweChilli Boys okwezandla njengoba yona idlala kule nkomishi ekubeni isengcupheni yokugencwa yizembe.
Leli phephandaba likhuluma noMenzi Masuku (23) ongumdlali wasesiswini weChippa, uthi isimo sezembe ababhekene naso kwiligi sibenza bangabe besaba nandaba nesicoco seNedbank esiyisango lokumela iNingizimu Afrika kwiCaf Confederation Cup.
“AbakwaNedbank sebeyosixolela, impela kumele ime kancane, isimo esibhekene naso kwiligi sisenza singabe sisaba nayo indaba kangako nesicoco seNedbank. Nginenkontileka ende neChippa ngakho-ke into emqoka njengamanje wukuthi sisindise le kilabhu ezembeni, iNedbank sizobuye siyibone.
“Into engihluphayo emoyeni wukuthi ngisemncane kabi ukuthi ngingaba nerekhodi lokuyisa ikilabhu ehlathini.
"Noma ngingaya kwenye indawo uma iChippa kuthiwa ilibhekisa ehlathini kodwa ngizohlale nginaleso silonda nje sokuthi ngayisa ikilabhu yabantu ehlathini. Unembeza uzolokhu ungidla,” kusho uMasuku.
Nokho uthi ukholwa wukuthi bazolivika izembe.
“Uma ngibheka abantu esibanga nabo ukuvika izembe basenkingeni enkulu uma ubaqhathanisa nathi. Thina nje okumele sikwenze ukugweme ukuya kwethu ehlathini wukuzinqobela imidlalo.
"Konke kulele kithina, yithi okufanele sizenzele umsebenzi singabheki abanye abantu,” kusho uMasuku.
UThabo Mnyamane odlala esiswini kwiSuperSport, uthi noma ngabe iChippa ibingaviki izembe ibingeke ibehlule.
“Ngeke sikufake emakhanda ukuthi kabasenandaba neNedbank ngenxa yokuthi bafuna ukuvika izembe ngoba lokho kungasidalela izinkinga.
"Futhi-ke kangikholwa ukuthi bazoza kulo mdlalo ngenhloso yokuzohlulwa. Siyakwazi okufanele sikwenze, wukunqoba nje kuphela.
“Njengoba umqeqeshi wethu (uStuart Baxter) ehamba uma kuphela isizini sifuna ahambe nendondo yegolide hhayi eyesiliva. Noma kanjani sizokwenza ngawo wonke amandla ukuthi siyawunqoba lo mdlalo ukudlulela kowamanqamu,” kusho uMnyamane.