SIMISELWE UBUXOKI ISIKHULU SEBHOLA
KUMISWE isikhulu esithathwa njengomgogodla weSouth African Schools Football Association (Sasfa) okuyinhlangano eyengamele ibhola lezikole eNingizimu Afrika.
ILANGA lithole ukuthi ikhulunyelwa phansi kwamatafula eyokumiswa kukaSteve “Principal” Pila onguNobhala wale nhlangano.
Kuthiwa usolwa ngokuthatha izinqumo ngaphandle kokubonisana nobuholi. Kuthiwa ubefuna ukumisa omunye umholi ngaphandle kokubonisana nabambisene nabo ebuholini.
Uphinde asolwe ngokusetshenziswa yiSouth African Football Association (Safa) esembangweni wokuphatha ibhola lezikole neSasfa. Kuthiwa uPila akasahoshelani noMandla “Shoes” Mazibuko onguMengameli weSasfa.
UMazibuko uvumile ukuthi uPila umisiwe. Nokho uPila uthi kayikho leyo nto.
Ugcizelele ukuthi yena usenguNobhala weSasfa.
Kusenjalo, iSasfa KwaZuluNatal ithi konke sekumi ngomumo ngemidlalo yeDanone Nations U/12 Cup ezokuba ngoMgqibelo eSugar Ray Xulu Stadium, eClermont. USmanga Mgenge onguNobhala weSasfa esifundazweni, uthi balindele imidlalo esezingeni eliphezulu njengoba belilikhulu isasasa kweyezifunda.
Isikole esizokudla ubhedu ngoMgqibelo sizomela iKwaZulu-Natal emidlalweni kazwelonke eGoli.
Esizonqoba kwekazwelonke sizomela iNingizimu Afrika emidlalweni yomhlaba ezokuba se-United States of America (USA) ngoMandulo (September).
Sikhishwe ngoLwesibili isikole esizomela iSisonke njengoba bese kuyiyona yodwa esele. Lesi sifunda sizomelwa yiNkilabantwana Primary School yaseBulwer.
Selulonke uhlu lwezikole ezizokhiphana inkani eClermont lumi kanje: Siyathuthuka Primary (Umkhanyakude), Lewis Primary (Umzinyathi), Ningizimu Primary (Zululand), Enkululekweni Primary (Amajuba), Ndongeni Primary (Umlazi), Nkilabantwana (Sisonke), Shakaskraal Primary (Ilembe), Dunywa Primary (Ugu), Mophela Primary (Pinetown), Sinaye Primary (King Cetshwayo), Muzi Thusi Primary (Umgungundlovu) ne-Inkunzi Primary (Uthukela).