I-CHIEFS INYONYOBELA ISIBABULI SOMDLALI
INGASE ilahlekelwe yisibabuli somdlali iReal Kings United FC egijima kwiNational First Division (NFD) njengoba kuvela ukuthi singase sibuyele kwiKaizer Chiefs esikhulele kuyona.
ILANGA lihletshelwe yimithombo yalo ukuthi iChiefs isinalo uhlu lwabadlali ezobachitha nezobasayinisa uma kusongwa isizini ngelizayo.
Kuthiwa kuzokuthi kungaphela isizini nje bese iChiefs iba nomhlangano omkhulu okuyilapho kuzobhungwa khona ngabadlali nangekusasa lomqeqeshi, uSteve “Mphathi” Komphela.
ILANGA lincinzwe ukuthi uMo- ndli “Vala” Miya, odlala ophondweni lwesokunxele kwiKings oyisithandwa sabalandeli bale kilabhu ngenxa yomjiko oneNkosi phakathi, ukulolu luhlu lwabadlali abangase basayiniswe yiChiefs.
Kuthiwa kunezinhloli ezike zamubona emidlalweni eyahlukene yeKings zabe sezibikela iChiefs ngaye. Lo mdlali uvele ukhulele esikhungweni seChiefs kodwa yamdedela ngendlela engaqondakali.
Leli phephandaba libuza uBobby “Bobsteak” Motaung oyiMenenja-jikelele yeChiefs ngalolu daba izolo ngoLwesithathu emini, uthe: “Njengamanje kangifuni ukukhuluma ngendaba yabadlali esibafu- nayo kumbe esizobachitha. Ngingakuqinisekisa ukuthi sizwile ngoMiya futhi kungenzeka kube wukuthi usohlwini lwethu kodwake kangifuni ukukhuluma ngendaba yabadlali manje. Emasontweni amabili ezayo sizokuba ne- workshop okuyilapho sizobhunga khona ngakho konke okuthinta ikilabhu.”
Leli phephandaba lithole ukuthi akuyona iChiefs kuphela egaqele lo mdlali kodwa kukhona namanye amfunayo kwi-Absa Premiership okukhona kuwo neyaKwaZulu-Natal. Ukuze iChiefs ithole lo mdlali kuzofanele ikhulume neKings kwazise uMiya usanda kwelula inkontileka yakhe nale kilabhu eholwa nguBongani Ngidi.