Unqaba eyokukhutshwa yitshe kabili
UMthembu uzethembile kwiComrades yanonyaka
USHAYA phansi ngonyawo ukuthi ngeke aqhuzulwe yitshe elilodwa kabili uBongumusa Mthembu olwela ukwenza kangcono isikhathi sakhe kwiComrades Marathon yanonyaka ezokuba mhla zizine kuNhlangulana (June) isukela eThekwini isongwe eMgungundlovu.
UMthembu uphakamise ifulegi leKwaZulu-Natal eba ngumgijimi wokuqala oMnyama ukunqoba lo mjaho ngowezi-2014 kusukwa eMgungundlovu kubhekwe eThekwini.
Utshele leli phephandaba ukuthi uzimisele ngokwenza kangcono isikhathi sakhe sangowezi-2011 esingu-5:53.
UMthembu zijwayele ukungamvumi izinto uma kubhekwe eMgungundlovu njengoba ngowezi-2015 engene unombolo 17.
Ujwayele ukuthwala kanzima ukungena nabokuqala abali-10. Nokho uthi lokhu kuzojika nonyaka kulo mjaho ogubha iminyaka engama-92 wasungulwa. UMthembu uqale ukuvelela kulo mjaho ngowezi-2010 engena unombolo 3, wathatha isibili ngowezi-2012, wawunqoba ngowezi-2014 kanti ungene isithathu nyakenye.
Uthi nonyaka uziqeqeshe kanzima enabagijimi abavelele kubal- wa uDavid Gatebe onqobe lo mjaho nyakenye kanjalo noGift Kelehe ophethe isicoco uma kubhekwe eMgungundlovu. Laba bagijimi bacijwa nguJohn Hamlett osehole abagijimi abehlukene ukunqoba lo mjaho.
“Okubalulekile nonyaka wukuba singalenzi iphutha lanyakenye lokudedela umgijimi ongaziwa ukuba avule igebe phambili.
Iningi lethu ebelisebhantshini eliphambili belingazitsheli ukuthi uGatebe angawunqoba lo mjaho nyakenye ngesikhathi evula igebe. elikhulu
Besizitshela ukuthi sisazombamba kanti sizishaya ngendlebe etsheni. Nonyaka uma kukhona umsubathi ophumayo ngizohlala kuyena ukugwema okungenze nyakenye.
“Okuhle wukuthi ngiziqeqeshile nabasubathi bakaJohn okuyibona ababhekwe kakhulu kulo mjaho onyukayo.
Ngibazi njengoba ngizazi,” kusho uMthembu osanda kungena unombolo 7 kwiTwo Oceans Marathon futhi ophethe irekhodi laseNingizimu Afrika le-100km nendondo yesiliva akuthole nyakenye kwiWorld 100km eSpain.
UMengameli wezwe uJacob Zuma usanda kuphumela obala wathi angakujabulela ukuthi isicoco seComrades Marathon sisale KwaZulu-Natal nonyaka.