Bahlela ukudunga umgubho wePirates
IWits iyizingqwele ezintsha ze-Absa Premiership
BAFUNA ukudunga umgubho we-Orlando Pirates abadlali beLamontville Golden Arrows enobudlelwano obuhle nale kilabhu ehlanganisa iminyaka engama-80 yasungulwa kule sizini.
Abafana Bes’thende baholwa nguMato Madlala kanti bazodudulana nePirates ephethwe ngu-Irvin “Iron Duke” Khoza kwi- semi final yesibili yeNedbank Cup ezokuba ngeSonto ngo-15h00 ePrincess Magogo Stadium, KwaMashu. I-Arrows iya kulo mdlalo ngenhloso yokuziqophela umlando ngokungena okokuqala ngqa kowamanqamu wale nkomishi kwazise kayikaze iyinqobe.
Nokho iPirates yiyona eyidinga kakhulu le nkomishi kwazise igubha iminyaka engama-80 yasungulwa. Kuvela ukuthi uKhoza yiyona nkomishi asethembe ukuthi uzogqiba ngayo ihlazo emgubhweni ukujabulisa abalandeli kule sizini ebe yimbi kakhulu kumaBhakabhaka ethelwa ngehlazo lika-6-1 nelika-6-0 yiSuperSport United neMamelodi Sundowns ngokwahlukana.
UNduduzo “Sulu” Sibiya odlala esiswini kwi-Arrows, uthi bafuna ukufaka unyawo lwedada emgubhweni weBucs.
“Engifuna ukukubeka kucace wukuthi sizobaphazamisa ezinhlelweni zokugubha le minyaka ngendebe. Sesihambe ibanga elide kakhulu ukuthi sesingavuma ukuphuma manje. Siyakuqonda ukuthi bagubha iminyaka engama-80 kodwa nathi siyayidinga le nkomishi.
“Sifuna ukujabulisa ngayo uSihlalo wethu osinakekela ngokweqophelo eliphezulu. Yisona sipho esifuna ukumupha sona lesi ne- top 8. Amathuba okuthi siwunqobe lo mdlalo makhulu kakhulu njengoba sidlalela eMagogo.
“Engikucelayo nje wukuthi abantu baKwaZulu-Natal baphume ngobuningi babo ukuzoseseka kulo mdlalo bangavumeli ukuthi iPirates izosigqiba enkundleni yethu,” kuzicelela uSibiya.
UMpho Makola odlala esiswini kwiBucs, uthi kalikho elinye ithuba elidlula leli ukujabulisa abalandeli babo.
“Lo mdlalo ufana nowamanqamu kithina, iligi isiphuthile ngakho-ke sifuna le nkomishi. I-Arrows izalelwe yinj’ endlini, isithole kabi sidiniwe ngeke sibe nalo uzwelo. Kayisekho enye inkomishi esizogubha ngayo iminyaka engama-80 ikilabhu yasungulwa yile kuphela ngakho-ke kasikwazi ukuphoxa,” kusho uMakola. Kwi- semi final yokuqala kuzobhekana iChippa United neSuperSport United emdlalweni ozokuba ngoMgqibelo ngo-15h00
IWits iyizingqwele ze-Absa Premiership emuva kokunqoba iPolokwane City ngo-2-0 wamagoli kaJames Keene noDaine Klate izolo eGoli. ISundowns icazelane amaphuzu neMariztburg United kuba ngu-2-2 okwenze isicoco seligi saphelela kwiWits. eSisa Dukashe Stadium, eMonti.
Imiphumela ye-Absa Premiership imi kanje: Sundowns 2, Pmb Utd 2; Pirates 0, Ajax 0; Platinum 2, Chiefs 0; Celtic 0, Free State 0; Wits 2, Polokwane 0; Cape Town City 1, Arrows 0; Baroka FC 0, Highlands 0; Chippa 3, SuperSport 0.