Makuqhakanjiswe nokuhle phela okungafundwa yintsha
NGIYAXOLISA impela ngokulokhu ngibuyela emuva, wukuthi nje kukhona izinto esingeke nakancane sikwazi ukungazisho, sizishiye zilenga.
Yize seluke lwakhulunywa lolu daba kodwa ngiyathanda ukubuyela kulona. Emasontweni edlule ngike ngakhuluma ngachaza ngemiyalelo noma imigomo echaza ukuthi uhlelo oluthile lulungele ukubukwa ngabantu abangakanani ngeminyaka.
Lokhu kuyasiza uma unobuxhakaxhaka besimanje obubizwa ngo- explora nobanibani abethulwe wuhlelo olushintsha njalo lwakwaDSTV. Lapho ngiya khona yisekutheni uma uhlelo lunezinhlelo ezingalungile, mhlawumbe eziqukethe ulimi oluqojeme malufakwe ebusuku sezilele izingane.
Kithina esingenawo ama- explora ne-techonology yesimanje kuba nzima ukulawula lezi zinto. Kangiphathi-ke uma unomntwana oneminyaka eyisihlanu noma ngaphansi ngeke nhlobo umtshele ukuthi makayohlala kwelinye igumbi noma uzame ukumvala amehlo - uvele abuze ukuthi ungivalelani amehlo mama, zivele ziyime kuwena, ungakwazi ukuchaza.
Okungenza ngikhulume ngale ndaba wuhlelo lukaSomizi “Somgaga” Mhlongo, olukhombisa impilo ayiphilayo njengoba manje selukwisizini yesibili. Lolu hlelo lukamabonakude lukhonjiswa kuMzansi Magic (161), njalo ngoLwesithathu ngehora lesi-8 ebu- suku, bese luphinda ngoMgqibelo ngehora lesikhombisa ebusuku.
Ngiyaye ngizame ukuluziba ngoLwesithathu ngoba ngithi ngifuna ukulubuka kahle untabakayikhonjwa ematasa edlala ukuze angayiboni yonke le migilingwane eyenzeka kulo. Okungicacelayo wukuthi nalo ihora lesi-7 abantwana abanye babo basuke bengakalali. Ngifuna nje inkulumo yami ukuyibhekisa kuyena ngqo uSomizi ngoba kule reality show nguye onelungelo lokusho ukuthi yini engakhonjiswa kubantu, futhi yini engakulungele ukubonwa.
Ngifisa ukwazi nje ukuthi sifundo sini esitholwa yizingane kulolu hlelo - ngabe inhloso wukuzikhombisa ukuthi kumuntu onemali into ebalulekile wutshwala nokushintsha abantu athandana nabo. Yisiphi isifundo asinika intsha ebukela kuyena?
Lo saziwayo odume cishe umhlaba wonke uqale ngokutshela umngani wakhe uTT Mbha ukuthi akanayo indoda kodwa unamadoda, waphinda esiqeshini esilandelayo watshela omunye wabangani bakhe ukuthi amadoda uwashintsha njengamaphenti, akanandaba ukuthi abantu bathini ngoba le yimpilo yakhe.
Esiqeshini sesonto eledlule uvele eqabulana nelinye ibhungu abebehlangana nalo okokuqala, waze washo ukuthi impela ubeziqabulela nje yena edlula. Lapho konke lokhu kwenzeka nje, kuhlezi kukhonjiswa izinhlobonhlobo zotshwala okuyinto eyenziwa bevuka nje kuloya muzi.
Kanginankinga noSomgaga osikhombisa ngempilo yakhe nokuthi kumele intsha yenzenjani ukugcina amaphupho ayo efezeka kodwa engiphikisana nakho wukwenza utshwala nokuqoma kube sengathi yiyona kuphela into ephilisa abantu abanemali. Kwisizini yokuqala yalolu hlelo uSomizi ukhombise bonke ubu “glamour” bakhe nokuthi uziphilela impilo yakhe.
Kulokhu bengilindele ukuba kugxilwe ezintweni ezinhle azenzayo emphakathini noma ngabe uyakhokhelwa noma cha, izinto ezimenza abe ngumuntu othandwa kangaka. Lokho kakwenzekanga kunalokho sifunda ngotshwala obubizayo, wukuhamba enza izinto ethi akanandaba, nokuhamba eqabula abantu emphakathini.
Ngibona kuyinto ezomehlisa isithunzi kubazali okuyibona abakhokhela lama-DSTV. Phela yize sibuka kodwa uma ubone into ezokwenza ubuzwe imibuzo ongeke ukwazi ukuyiphendula uyaye uzame ukuwugwema lowo mdlalo ukuze ungazitholi usenkingeni ongazi ukuthi uzophuma kanjani kuyona.
Siyacela singababukeli ukuba sibhekelelwe thina esingenabo omabonakude besimanje nobuxhakaxhaka bama- explora - sithi abakhiqizi bemidlalo nabahleli bayo mabazame ukugwema iziqephu eziveza izinto ezingabukeki.
Makuvikelwe abantwana nentsha yakithi. Kungaqhakanjiswa izinto ezingayiholela ophathe.