EZOBUCHWEPHESHE:
KUYAJABULISA ukubona izitshudeni emazingeni emfundo ephakeme zithweswa iziqu zemfundo emikhakheni ehlukene.
Isibalo sezitshudeni eziphothula izifundo zazo ngempumelelo siyanda kakhulu kodwa asihambisani namathuba emisebenzi amfimfayo. Sebebaningi abantu abafuna imisebenzi, sebedlula ngisho amathuba emisebenzi.
Okumele sikwenze njengabantu abasha wukuzama ukuzakhela amathuba ngokuziqalela awethu amabhizinisi ngokusebenzisa i- technology.
Uma lingakaveli ithuba lomsebenzi, akube khona okwenzayo ukuzakhela isipiliyoni esidingekayo kweminye imisebenzi. Uma kuvela ithuba lokuvolontiya noma ama- internship lithathe lelo thuba ngoba liyawenza umehluko kwi-CV yakho. Ukuqala ibhizinisi sekuyaphoqa manje ngoba esikhathini samanje awusanele umholo owodwa. Abantu bayasebenza kodwa eceleni kukhona okunye abakwenzayo ukweseka imiholo abayitholayo ngoba izinga lempilo seliphakeme kakhulu kunakuqala.
Noma kungaba yini oyifundele kholelwa ekutheni ungaliqala ibhizinisi lalowo mkhakha liphumelele ngoba isizwe siyaludinga ulwazi onalo noluzuzile esikoleni.
Kubalulekile ukubheka ukuthi umphakathi wangakini ubhekene naziphi izinkinga bese uzama ukuletha isixazululo, abantu bayohlala besikhokhela isixazululo. Impumelelo yakho yezimali incike ekutheni yisiphi isixazululo osilethayo emphakathini.
Ubuchwepheshe bukhona ukukusiza usabalalise ibhizinisi lakho, sebenzisa nezinkundla zokuxhumana ukuzazisa kubantu ngolwazi onalo emkhakheni owufundele futhi ungami lapho, uqhubeke ufunde uye phambili. Amathuba empumelelo maningi kakhulu endimeni yezamabhizinisi, yenza ibhizinisi ngolwazi lwemfundo oluzuzile.