Igxile kwi-technology emculweni i-Godfathers
AMAKHEHLA asezakhele udumo ngokudlala umculo we- deep house akhala ngobuvila kumaciko aseNingizimu Afrika nokungafuni ukuzithuthukisa ngezobuchwepheshe.
La makhehla asezakhele udumo ngokuklwebha amapuleti azibiza ngamaGodfather omculo we- deep
house. UMasia Masha noVictor Ngcongwana basePitoli babalwa nalabo abahamba phambili ekukhiqizeni umculo we- deep house njengoba sebeze basungula ne- app yalolu hlobo lomculo.
“Le app esiyibiza ngeGodfather App iqukethe umculo okhiqizwe yithina esiwubiza ngeNostalgic
Deep House. Ngaphandle komculo, le app itholakala ezinkundleni ezahlukene kulabo abanomakhalekhukhwini besimanje, inomsakazo wethu nomabonakude wethu,” kuchaza uMasia. Uthi nakuba bengene emculweni eminyakeni engaphezulu kwengu-25 eyedlule kodwa baqale ukudlalela abantu ngo-2013.
“Kule minyaka bekudlala uVictor yedwa okwami bekuwukuthenga umculo owehlukene we- deep
house, uVictor abewudlala emicimbini yabantu,” echaza.
Uthi baqale ukuhlangana badlale ndawonye ngo-2013 lapho bese beqala nokuhambela izindawo zobumnandi. Uthi ngesikhathi beqala ukuhambela izindawo zobumnandi yilapho bebone kungcono basungule i- app yabo kwazise abantu bebekuthakasela ukudlala kwabo.
“Ngesikhathi siyiqala le app bekunezingoma zabanye abantu ko- dwa ebesizidlala emicimbini. Ngokuhamba kwesikhathi siyivuselele kabusha i-app yethu njengoba isiqukethe izingoma zethu zodwa ezikhiqizwe yithina,” kuchaza uMasia othi bazimisele ngokuqopha umlando kulo mkhakha njengoba besemabhukwini omhlaba ngokuba ngabokuqala ukukhipha i-album enezingoma ezingu-300 ngonyaka owedlule.
“Le album siyikhipha kwi-USB sangena emabhukwini omhlaba. Amaciko akuleli alibele ukulala ekubeni ezobuchwepheshe zikhona futhi obungawasiza azikhulise ukuze enze imali. Ngokwami alikho nelilodwa iciko engilaziyo elicebile,” esho ngaphandle kokunanaza.
Uthi bona asikho isidingo sokulokhu bezimaketha emisakazweni nakumabonakude ngoba banakho okwabo okokuzimaketha njengoba sebegabe ngabalandeli abaqhamuka emazweni ahlukene omhlaba. “Sinabalandeli emazweni ahlukene kanti ne-app yethu isithengwe ngabantu abangaphezulu kuka-50 000 emhlabeni.
Bakhona nalabo abayithenge ngokuxhumana nathi sabathumelela nge- email,” esho. Uthi bazimisele ngokufukula namanye amaciko azimisele ukuthuthuka ngezobuchwepheshe.
“Konke abalandeli bethu abakudingayo nabafuna ukukwazi ngathi kutholakala kwi-app yethu ngoba nomculo omusha bazowuthola khona,” elanda. Baphethe ngokuthi ngempelasonto yeVodacom July bazobe beziqopha bukhoma kubuka abantu abasemazweni ahlukene omhlaba Eyadini Lounge.