KUVELA ELOMHLATHI KWABE-BUCS
ITheku seliphenduke ikhaya lesibili lamaBhakabhaka
IBUYISE ithemba kubalandeli bayo ngesicoco i-Orlando Pirates ifinyelela kowamanqamu weNedbank Cup iguqisa iLamontville Golden Arrows ngo-1-0 kwi- semi final yalo mqhudelwano izolo ngeSonto ntambama ePrincess Magogo Stadium, KwaMashu.
Igoli okunqobe ngalo iBucs lingqofelwe enethini ngu-Abbubaker Mobara ngomzuzu wama-35. IBucs izotholana neSuperSport United kowamanqamu weNedbank ngoMgqibelo womhla zingama-24 kuNhlangulana (June) eMoses Mabhida Stadium, eThekwini. ISuperSport yiyona etonyulwe ukuba sekhaya.
ISuperSport yona ifinyelele kowamanqamu emuva kokuhlula iChippa United ngo-4-2 wamaphenathi ngoMgqibelo ntambama eSisa Dukashe Stadium.
Lo mdlalo uyithuba elikahle kwiBucs ukubuyisa izinduku njengoba iSuperSport ibukise ngayo iyitaxa ngo-6-1 kowe-Absa Premiership. La makilabhu azohlangana kowamanqamu nje, nangesizini edlule yiwona agijime lo mdlalo onqotshwe yiSuperSport. Lesi sicoco siyisango lokumela elakuleli kwiCaf Confederation Cup.
IBucs selokhu kuqale isizini idonsa kanzima njengoba ibiwukudla kwesibhaxu ekubeni kuwunyaka omqoka njengoba igubha engama-80 yasungulwa. Abalandeli bayo bese bephelelwe yithemba lokuthi kukhona engabajabulisa ngakho ekubeni kuwunyaka wayo omqoka.
Nokho libuyile ithemba ifinyelela kowamanqamu kangangoba baphume enkundleni bejabulile. Abanye bebelibeka ngesihloko elokuthi iSuperSport isiyogcina icala, inkomishi sekungeyabo.
UKjell Jonevret ocija iBucs, uthi sekusele kancane bafeze iphupho likasihlalo weBucs, u-Irvin Khoza nelabalandeli (ngokunqoba lesi sicoco).
“Abalandeli bethu kabakaze bajabule ngale sizini ngenxa yesimo esingesihle ebesenzeka. Ngiyajabula ngoba baphume bejabulile futhi ngiyethemba ukuthi nalabo abebengekho enkundleni bajabulile. Sekusele kancane sibajabulise nosihlalo wethu ngokunjalo njengoba ikilabhu igubha iminyaka engama-80 yasungulwa. Ngijabule ngendlela esidlale ngayo ikakhulukazi ngesiwombe sokuqala. Nginethemba lokuthi sizobuya nayo le nkomishi,” kusho uJonevret.
UClinton Larsen ololonga i-Arrows, uthi lo mdlalo ubakhulisile.
“Ngesiwombe sokuqala kasidlalanga kahle. Ngikholwa wukuthi abadlali bami abasebancane bathukile ikakhulukazi ngesiwombe sokuqala. Okufanele sikuqonde wukuthi laba badlali bethu basebancane futhi iningi labo belingakaze lidlale kwi- semi final kugcwele kanjena kodwa-ke bazamile kangikhali ngalutho,” kusho uLarsen. I-Arrows izophinde idudulane neBucs kowe-Absa Premiership ozokuba ngoMgqibelo ngo-15h00 eMoses Mabhida Stadium. Lokhu sekuphendule iTheku ikhaya lesibili lamaBhakabhaka njengoba ezophinde abuye esezodlala owamanqamu neSuperSport.