UShenge uchaze isizathu ngeNquthu
EZEPOLITIKI: NoMengameli Zuma ubekhankasaº
ICHAZE impi yevoti kuMasipala waseNquthu, maphakathi neKwaZulu-Natal, njengebhuloho lokuwelela kuMasipala wesiFunda uMzinyathi iNkosi Mangosuthu Buthelezi engumengameli weNkatha Freedom Party (IFP), okuyikhona okwenza abaholi abaphezulu be-African National Congress (ANC) baphume bengena eNquthu.
Lokhu ikusho izolo ngeSonto eMkhonjane, eNquthu njengoba sezihubela sakusha ngokhetho lobuholi bukamasipala wakule ndawo, olungoLwesithathu.
“Ngiyazi ukuthi kakimina kuphela olapha eNquthu namhlanje. Umengameli (uMnu Jacob Zuma) akakude nalapho ngikhona, umatasatasa uyanandisa, ujabulisa abavoti ngomculo nokusina.
"Kuyamangalisa ukuthi uvumile ukuza lapha. Nike nambona umengameli, yisekela lakhe, ngusihlalo kazwelonke (we-ANC), unobhala-jikelele wayo nomgcinimafa bephuma nkalo zonke beyokhankasa okhethweni lokuchibiyela?
"Ake nginitshele-ke ukuthi kungani belapha, kubona indaba kayikho mayelana neNquthu, bafuna amandla kuMasipala wesiFunda uMzinyathi. Uma i-ANC inganqoba eNquthu, izothatha noMzinyathi, ngeke yakubekezelela ukuhlulwa yi-IFP eNquthu isibili. Phela ukunqoba kwe-IFP eNquthu kuyobe kusho ukunqoba uMzinyathi, okuyokwe-nza i-ANC ibukeke kabi. Inkinga nge-ANC wukuthi ihlale ilwela ukubukwa kahle hhayi ukuthi yona uqobo ibe yinhle,” kusho iNkosi Buthelezi.
Itshele abantu abebethamele inkulumo yayo ukuthi iqembu layo liphathele abantu baseNquthu izindaba ezimnandi, liyolwela amalungelo ezakhamizi zakule ndawo osekunesikhathi eside enyathelwe ngosopolitiki abangawukhathalele umphakathi. Ibatshele ukuthi i-IFP ibalalele abantu baseNquthu. Ithe abavoti abalinganiselwa ezi-80 000 baseNquthu kuzomele banqume ngoLwesithathu ukuthi bafuna ukuholwa ngubani.
“Isinqumo esihle kubantu baseNquthu ngesokuvotela i-IFP. Kulokhu kumele sigile isampula, sifuna babe baningi abantu abazovotela i-IFP ukuze i-ANC izozisola ngokunishaya indiva uma nikhuluma,” kusho inkosi.
Ikhumbuze abantu ukuthi emuva kokhetho lwanyakenye, kucacile ukuba kufanele kuhole iqembu layo - kwasala ukuba kuqokwe imeya, usomlomo nabanye abaholi bakamasipala. Ithe kuvele kwaba nemihlangano eminingi yokuqoka laba baholi kodwa yaphazanyiswa ngandlela zonke “ukwenzela ukuthela othulini iNquthu”.
Itshele abantu ukuthi bebekuqonda ukuthi lokhu bekuyipolitiki nje ebiyenzelwa ukuba kuze kushaye isikhathi sokuthi uNgqongqoshe wezokuBusa ngokuBambisana nezoMdabu KwaZuluNatal, uNkk Nomusa Dube-Ncube angenelele.
“Ngokomthethosisekelo, ungqongqoshe wezokubusa ngokubambisana nezomdabu, angasihlakaza isigungu samakhansela bese umasipala ewunikela kumlawuli. Ngamanye amazwi, ungqongqoshe angathatha umasipala awunikele kwi-ANC uma kuwukuthi abantu bavotele elinye iqembu. Kulula nje lokho, kuvele kunyathelwe ubuholi obuqotho kusetshenziswa amacebo angcolile epolitiki,” kusho iNkosi Buthelezi.
Ithe kuyabaxaka nje ukuthi osopolitiki bayaqinisa nje impela bathi bangabenzela lukhulu abantu baseNquthu uma bengabavotela.
“Ngithukile uma umholi weDe- mocratic Alliance (DA) (uMnu Mmusi Maimane) ethi bangayithatha iNquthu njengoba bedle iGoli, wakhohlwa wukuthi banqobe eGoli nje, bebelekelelwa yi-IFP.
"Sibe nesivumelwano ne-DA - ngesikhathi sokhetho (nyakenye) - sokuthi sizoyilekelela ukunqoba eGoli yona iseseke KwaZulu-Natal. Isivumelwano besesekelwe ekutheni iDA iyiso elinamandla ukungqolozela ubuholi be-ANC obungakhathaleli izakhamizi eGoli kanti i-IFP yona yenza okufanayo KwaZulu-Natal,” kusho uShenge.
Utshele abantu nokuthi i-ANC kayibazi nokuthi bayisidikiselo saliphi ibhodwe abaholi bomdabu njengoba ibenza amathuluzi nje epolitiki.
“Ngifuna ukubona izinhlaka zomdabu emiphakathini nabaholi bomdabu bethuthukiswa ukuze baqhubeke noholo oluhle abalukhombise iminyaka ngeminyaka.
"Lokho-ke ngeke kwenzeke ngaphansi kwe-DA, futhi-ke kakukaze kwenzeke ngaphansi kwe-ANC. Kulolu daba i-IFP ihluke kakhulu ezimbangini zayo, yithina kuphela esilalela izwi labantu. Zikhona ezinye izinto esingahambisani nazo, njengemigomo yezomnotho nendlela i-ANC engayishayi mkhuba ngayo inkohlakalo.
"Yinkohlakalo nemigomo yezomnotho engaphusile okuholele ekutheni izwe lethu ligcine lidilizelwe esigabeni sovucu kwezomnotho. Kungani iNingizimu Afrika yonke kufanele ingcoliseke emhlabeni ngenxa yendoda eyodwa vo (Mengameli Zuma)?
"Kangingedwa kwabasola umengameli, kakuyona i-IFP namanye amaqembu aphikisayo kuphela asebekhathele nguyena. Bangaphezu kwekhulu omakadebona beANC, abebengongqongqoshe nabebengamalunga eNEC (ye-ANC) asebemncenge kwaze kwasha imihosha ukuba ehle esikhundleni.
"Izigidi ngezigidi zabantu baseNingizimu Afrika zijoyine umkhankaso wokuba ehle esikhundleni,” kusho iNkosi Buthelezi.
Ithi kunabaholi abaphezulu kwiANC abayincengile ukuba ibonisane noMengameli Zuma - njengomuntu omdala - “kodwa ngishilo nasephalamende ukuthi umengameli akangilaleli. Uma engalaleli omakadebona beqembu lakhe nokukhala kwabantu baseNingizimu Afrika, kuyacaca ukuthi ngeke abushaye mkhuba ubuhlakani bukaButhelezi”.
Ibe isinxusa abavoyi ukuba bangalenzi iphutha bashaye ngesithende abantu ababakhathalele.
“Masikusho singananazi ukuthi lapha abantu babaluleke ngendlela eyisimanga, futhi-ke abantu baqoke i-IFP,” kusho yona.
INquthu isiphenduke isidleke sezinyosi ebusika kubelusi nje - amaqembu ezepolitiki engena ephuma khona - kuzokhumbuleka ukuthi okhethweni lwanyakenye bese kuqokwe uMnu Mabilabila Kunene we-IFP njengemeya kodwa kwasuka izidubedube ebezihlehlisa imihlangano yokuqoka ubuholi.
Kangingedwa kwabasola umengameli.