Kumbhedele obeqola ngegama lomhloli
Ubefuna ama-R5 000 ngezikhala zomsebenzi wobuthishela
KUVUKE isisho esithi kakukho qili lazikhotha emhlane kuthisha waseSiphingo, eningizimu yeTheku obeqola ozakwabo abangasebenzi ebakhokhisa imali ngoba ethi uzobatholela umsebenzi, esebenzisa igama likaMnu Sibusiso Mngadi ongumhloli waseMlazi, eningizimu yeTheku.
ILANGA likhulume noNkz Zanele Msomi (53), waseMlazi ongomunye wothisha abebethenjiswe umsebenzi, uthi ubesekhokhe u-R5 000 (womgwazo) ngoba azi ukuthi ukhokhela umhloli ozomtholela isikole azosebenza kusona. Ubevele efundisa phambilini kodwa waqoma ukushiya ngowezi-2015 wathatha imali yakhe yomhlalaphansi.
“Bengihleli ekhaya sengifisa ukubuyela emsebenzini. Ngihlangane nalo thisha ongitshele ukuthi usebenzisana nomhloli uMngadi, okunguyena okhokhelwa imali ukuze akutholele isikole ozosebenza kusona. Ngenxa yokuthi ngiyamazi umhloli abekhuluma ngaye, ngibe nethemba. Ngenze njengoba eshilo ngawukhipha u-R5 000 ngawunika lo thisha wangithembisa ukuthi uyowunika umhloli uMngadi,” kusho uNkz Msomi. Uthi le mali uyikhokhe ekuqaleni konyaka enethemba lo-kuthi kuzoshaya le nyanga esesebenza. Ubehlale exhumana noMnu Ngidi kodwa angayikhulumi eyomsebenzi.
“Ngiqale ukusola ukuthi kukhona okushaya amanzi ngibona kuhamba isikhathi uMnu Mngadi engasho lutho kimina.
"Bekuthi noma ngihlangana naye angakhombisi ukuthi kukhona akwaziyo ngemali engiyikhokhile," kusho yena. Ngokwesethembiso salo thisha obemkhokhisa, bekumele baqale ukusebenza kulo nyaka kodwa babona isikhathi sihamba kuthulekile.
Uthi baqale lapho-ke ukumtshela ukuthi udaba bazoludlulisela emaphoyiseni. “Uthathe i-CV yami wathi kumele ihambisane nemali ukuze umhloli ezokwazi ukulukhuluma kahle lolu daba.
"Besekuthi uma sibonana naye lo thisha, angishalazele elokhu ethi mangilinde,” kusho uNkz Msomi. Uthi njengamanje umatasa ufuna umsebenzi eGauteng. UNkk Thokozile Ximba (56) waseMlazi, eningizimu yeTheku, uthi yena ukhokhiswe yilo thisha u-R2 000, emthembisa umsebe-nzi. Utshele leli phephandaba ukuthi ugcine ukufundisa ngonyaka wezi2001 - wayeka ngokomyalelo kadokotela - kwathi uma sekumele abuyele, kwavela ukuthi izikhala zisafunelwa othisha abafunde ngoxhaso lweFundza Lushaka. “Uma ngibuka izindonga zesikole kuvele kuthi mangishayeke phansi. Sekudlalwe kakhulu ngami kodwa uNkulunkulu nguyena oyongiphendulela,” kusho uNkk Ximba. UMnu Mngadi uthi wethuke kabi uma ezwa lezi zindaba, wathi yena akahlangene nokuqashwa kothisha. Uthi kodwa uNkk Ximba ubevele enayo incwadi ethi makabuyele emsebenzini, obekwenza kungadingeki ukuba agwazele umsebenzi.
Utshele leli phephandaba ukuthi kwenzeka lokhu nje, useke waphenywa ngoxhaxha lwamacala esolwa ngokugwazisa - okuyinto athi akayazi. Ugcine ephume phambili kuwona wonke lawo macala.
Okhulumela amaphoyisa KwaZulu-Natal, uLt Colonel Thulani Zwane, uthi kumele kuvulwe icala uma kuwukuthi bakhathazekile abaqoliwe. Okhulumela uMnyango wezeMfundo KwaZulu-Natal, uMnu Kwazi Mthethwa, uthi bayaphoxeka ngokuzwa izindaba ezifuze lezi. Uthi uma kuwukuthi lezi zindaba ziyiqiniso, kuzomele umnyango uthathe izinyathelo ngomsolwa.