ISICELO SOKUHLONISHWA KUKA-SAUL MSANE
UPHONSELWE inselelo ukuba uqhakambise igalelo lesishoshovu se-African National Congress (ANC) esalwa nomthetho wokudliwa komhlaba wabantu uHulumeni waKwaZulu-Natal.
AbeMsane Tribe Heritage Trust, bafuna kuhlonishwe ngesichuse uMnu Saul Msane ongenye yezingqalabutho ze-ANC.
Abanye kulabo ayeqokwe nabo ukuyokhulumela abomdabu ngendaba yomhlaba kwakunguDkt John Langalibalele Dube uMafukuzela onjengezulu ongunsunguli weLANGA, UMnu Sol Plaatje owaba ngunobhla-jikelele wokuqala weANC nabanye. UMnu Zwakele Msane, uthi bangajabula uma uhulumeni waKwaZulu-Natal ungakha isichuse ukuhlonipha uMnu Saul Msane, sibekwe esishayamthetho eMgungundlovu.
Uthi lokhu kungaba wuphawu oluhle lokuhlonipha leli qhawe. “Into ebuhlungu kakhulu wukuthi njenge- trust, kasilutholi usizo ezintweni ezifana nalezi lapha esifundazweni kodwa kuze kusukume uhulumeni kazwelonke uma sinezikhalo.
"Kuzokhumbuleka ukuthi ubaba uSaul Msane wabamba iqhaza elikhulu ngesikhathi eyingxenye yezithunywa ezahamba zaya e-United Kingdom ziyokhuluma udaba lokudliwa komhlaba. Kuyaxaka uma sekukhunjulwa amaqhawe yena asale ngaphandle.
"Siyafisa ukuba uhulumeni waKwaZulu-Natal wenze umfanekiso wakhe ozobekwa esishayamthetho noma eCity Hall eThekwini ukuze nentsha izofunda kabanzi ngaye, ahlonishwe njengawo wonke amaqhawe,” kusho uMsane.