ISEDUZE EYEZINGQONGQO
BASAZOBHEMA bakholwe abahlanyiswe yiziNgqongqo kuMantshontsho kaMasikandi Awards e-Albert Luthuli International Convention Centre (ICC) eThekwini, njengoba zisezinhlelweni zokukhipha i-albhamu neDVD kanye kanye.
Leli qembu lihlanganiswe nguMfiliseni Magubane onomude umlando kumasikandi noMzo Khanyeza odume ngelikaJayiva Zimnike othandwa yinqwaba yabalandeli nobuye abizwe ngenjini yase-East.
E-ICC zahlanyisa abantu sezivala umcimbi kanti ngoLwesihlanu beziqopha bukhoma iDVD eKhaya Multi Arts Centre, KwaMashu. Bekugcwele inqwaba yabasondelene nalolu hlobo lomculo, okungabasakazi nabanye abaculi.
Intokozo ibigcwele ngaphandle nangaphakathi kule theatre, kucaca nje ukuthi abahleli bahlele konke ngendlela. UMnu Thabo Ramokoena okhulumela leli qembu, uthi basezinhlelweni zokukhipha i-DVD neCD ngesikhathi esisodwa emasontweni amathathu ezayo.
“Bese bevele behlangene ngesikhathi abantu bebabona e-ICC, wukuthi sihlela ukuba konke kube sezingeni elifanele. Sifuna ukwenyusa izinga,”kusho uRamokoena.
Ngale kwabo kubuye kwanandisa osomahlaya uSimphiwe Shembe noSiyanda Maphumulo. Kuthe kungazelele muntu kwabizwa noRingo kwahlanya abantu.
Abanye abaculi ababonakele nguMjikijelwa, Abafana BakaMgqumeni, u-Ali Mgube nabanye. Bebekhona nabasakazi bakamasikandi uBheka noNgizwe Mchunu nobasi wabo wakudala uWelcome Bhodloza Nzimande nesiqumama uKhulubuse Zuma.