Izikhulu mazilungise eyesizini yebhola kuleli
INKINGA eyehlele iMamelodi Sundowns kule sizini ye-Absa Premiership esongwe ngempelasonto, kumele ukuba izivule amehlo izikhulu zikanobhutshuzwayo eNingizimu Afrika. Empeleni nje bekumele ngabe kudala zavuleka amehlo njengoba lesi simo sike sabhekana ne-Orlando Pirates emuva kokuba idlale kowamanqamu weCaf Champions League ne-Al Ahly yase-Egypt ngowezi-2013. Kuyiphindile iPirates emuva kokuba yehlulwe yi-Etoile du Sahel yaseTunisia koweCaf Conferetions Cup. La makilabhu abhekane nobunzima emidlalweni yeligi ngesikhathi ebuya kweyase-Afrika njengoba elinyalelwe ngabadlali abanye babulawa wukukhathala.
Lokhu-ke kudalwa wukuminyana kwemidlalo nezinkambo ezinde emigwaqweni enamaginxiginxi yase-Afrika uma eyodlala eyeCaf. Kule sizini kucacele nengane ekhasayo ukuthi abadlali abawumgogodla kwiSundowns bakhathele bawudaka. Kasazi ukuthi kuyoze kumemeze bani ukuze kuzwakale ezikhulwini zebhola laseNingizimu Afrika ukuthi le ndaba yokuba iligi yakuleli ihambisane nawase-Europe hhayi awase-Afrika yenza amaqembu e-Absa Premiership athwale kanzima.
Omunye umuntu angathi nakhu nje e-Europe kunamakilabhu adlala uxhaxha lwemidlalo bese ekhohlwa wukuthi imigwaqo yaseFrance, Spain, England njalo njalo, kayifani nhlobo neyaseBurundi, Malawi neCameron. Kunjalo nje, kwesinye isikhathi abadlali bathatha amabhanoyi bayodlula emazweni ase-Europe noma ase-Asia ngaphambi kokuba bayothi cababa ezweni thizeni laseAfrika abasuke beyodlala nekilabhu yakhona. Uma befika esikhumulweni, kuye kufanele ukuba bahambe amabanga amade ngebhasi, emigwaqweni engekho esimeni esihle.
Ngesikhathi amakilabhu aseNingizimu Afrika evalile, ephumule, imidlalo yeCaf isuke ingamile ihambisana namaligi ase-Afrika. Ukugqama kwamakilabhu emidlalweni yeCaf kusiza abadlali ukuba babonwe ngawakwamanye amazwe njengoba lo mqhudelwano usakazwa bukhoma eFrance, e-India, eCanada, e-United States of America (USA), emazweni ahlukene ase-Asia, eBrazil nakwamanye amazwe ase-Europe.
Ukubhacaza kwamakilabhu akuleli kwiCaf kwenza abadlali bakuleli bagcine bephelele kwi-Absa Premiership okuba nomthelela ongemuhle kwiBafana Bafana ebukeka nayo iphumputha njengoba igcine kudala ukujabulisa abathandi bakanobhutshuzwayo kuleli. Kuyiqiniso elibuhlungu ukuthi ukudlala emazweni aphesheya kwezilwandle kusiza abadlali ukuba baqine ukhakhayi ebholeni lomhlaba.
Amazwe aphumelelayo e-Afrika kunobhutshuzwayo yize kucaca ukuthi kusekude kakhulu ukuba leli lizwekazi linqobe iNdebe yoMhlaba yeFédération of Interna-tional Football Association (Fifa) iningi labadlali bawo bagijima e-Europe. Kuyiqiniso elibuhlungu ukuthi i-Europe ingcono kakhulu ngokuhlelwa kukanobhutshu-zwayo, okwenza abadlali bakhona bakhule lo mdlalo ugijima egazini labo.
Lokhu kufakazelwa wukuthi ngisho abadlali baseSouth America abavuthayo bagijima e-Europe. Kulaba badlali singabala uLeonel Messi, uNeymar da Silva Junior, uLuis Suarez, uMarcelo Jr, uCasemiro, uDiego Costa, uDani Alves ukubala abambalwa.
Uma kuwukuthi isizini kanobhutshuzwayo yaseNingizimu Afrika yashintshelwa ukuba ihambisane nawaseEurope ngoba leli lifuna ukusingatha imidlalo yamazwe ngesikhathi esivumelana nawase-Europe okuba nguNhlangulana (June) kuya kuNtulikazi (July) seyingabuyiselwa ekuqaleni konyaka ize iphele sekuya ngasekupheleni kwawo, hhayi le eqala ngoNcwaba (August) kuya kuNhlaba (May).
Sikusho lokhu ngoba sikubona kungawusizi unobhutshuzwayo waseNingizimu Afrika ukuhambisana namaligi ase-Europe. Imvamisa amakilabhu asuke ethunyelwe yiNingizimu Afrika emidlalweni yeCaf ayashesha ukuphuma, amaningi asuke ebalekela ukuthi azolinyalelwa ngabadlali futhi bazokhathala bese kuphazamiseka imidlalo yawo yasekhaya kwazise kutholwa amakinati nasemidlalweni yase-Afrika, ikilabhu ibe ikhiphe ezishisiwe izimali ihlelela imidlalo.
Nokho okuye kunezele ezinkingeni sibona kuyikhona ukuthi abadlali kabasitholi isikhathi sokuphumula uma ikilabhu yabo igijima kweyeCaf.