KUDINGEKA USHINTSHO KWI-ANC
MHLELI ngicela ukudlulisa umbono wami kwi-African National Congress ANC) esiyithandayo. Maqabane, noma ngabe siyathanda okanye kasithandi, ukhetho oludlulile beluyimbobo yokulunguza lapho siya khona.
Ngizokhuluma njengeqabane elidala kwi-ANC, eliyibambe ngeminyaka ye-1990 kwi-United Democratic Front (UDF). Umzabalazo walezo zikhathi wawunodlame, ivoti lalingasetshenziswa. Kwakushiswa amathayi, kuqhuma amabhomu kaphethiloli nezibhamu.
Ngikhumbula amazwi akhulunywa ngelinye lamaqabane elalibizwa “ngoSlovo” eralini eyayiseWadley Stadium e-Edendale, ngowe1993. USlovo wabuza uSbu Ndebele owayehamba noJoe Slovo (wangempela) ukuthi: “Njengoba siya okhethweni lowe-1994, uma sihluleka ukuwina senzenjani?” Kwakunezinsolo zokuthi ama-
Bhunu angase alukhwabanise ukhetho.
Lo mbuzo wamkhingca uNdebele ngoba yayingekho impendulo yawo, kodwa uSlovo wathi: “Kuyacaca ukuthi kuyomele sithathe i-AK 47 sidubule.” Wayesho ecula. Kwachwaza inkundla ngoba wonke umuntu ngaleso sikhathi wayesemzabalazweni, sasingenandaba nokuthi kuzokwenzekani, sasifuna inkululeko.
Kwakuvele kuqhuma izibhamu e-Edendale kulwiwa iSeven Days war, koHammarsdale koRichmond, amaqabane ayeyibambile. Yize lo mzabalazo wawugxekwa ngoba kwakulwa omnyama nomnyama, kodwa waba yindlela okwafinyelelwa ngayo enkululekweni.
Lona kwakuwumzabalazo owehlukile kunalo esibhekene nawo namuhla. Namuhla isitha seqabane yilona uqobo lwalo. Manje sisemzabalazweni wokuncenga amakha- nsela ukuthi makenze akuvotelwe. Ngangingakaze ngicabange ukuthi ngemuva kwenkululeko amaqabane ayobulalana wodwa ebanga izikhundla.
Ngangingakaze ngicabange ukuthi i-ANC iyothi uma isiphethe izwe ibe namakhansela akhohlakele nahlukumeza umphakathi owavoteleyo. Ngangingakaze ngicabange ukuthi amakhansela enhlangano yethu ayoshaya amalunga omphakathi uma ephikisana nezinto ezingezinhle azenza emphakathini.
Ngangingakaze ngicabange ukuthi imiphakathi iyofunzwa amakhansela engasawadingi, ngangingakaze ngicabange ukuthi isigungu esiphezulu senhlangano siyosisinga umengameli wenhlangano nowezwe noma engasenzi kahle, kubonakala ukuthi inqola uyibhekisa eweni.
Ngiyithanda impela i-ANC kodwa sekuyisikhathi soku- ba sizibuze ukuthi le nqola esiyigibele ibhekephi. Bekusamele yini umengameli aqhubeke aqedele ihlandla lakhe lesibili uma amaqembu aphikisayo ekhombisile ukuthi ubuthaka bakhe buyawazuzisa amavoti?
Ngabe leli lizwe liyobe lisasezandleni zenhlangano yethu i-ANC ngemuva kowezi-2019 uma kuhamba kanje? Ngizizwa ngingakhululeki ngesimo senhlangano yethu i-ANC, kakuvumi ngithule uma kuhamba kanje.
Ngeke ngikubekezelele ukubona inhlangano yethu eyasilethela inkululeko ishabalala phambi kwethu sibe sayizabalazela. Okushiwo nguMnu uSipho Pityana kuyiqiniso elingeke laphikiswa kodwa-ke iqiniso liyababa.
Kumele i-ANC izihlole, izibheke izibuze ukuthi ngabe siyaphi, siphikelelephi kule ndlela esihamba ngayo. Kumele ngabe isigungu senhlangano sithatha isinqumo esibhekisa inhlangano phambili nesizokwenza ukuba nalabo asebephelelwe yithemba abangavota noma bavotele amaqembu aphikisayo babuyelwe yithemba.
Sinye isinqumo esingenza abantu babuye bathembele kwi-ANC, ukuthi isigungu sishenxise umengameli esikhundleni sokuhola izwe nokuhola inhlangano bese kukhushulwa umholi osemncane phakathi kukaFikile Mbalula noma uMalusi Gigaba.
Akukho ukujikela emuva kwendlu, siyamthanda uZuma kodwa usemanikiniki udaka, kawusazi ukuthi uzoqalaphi uma uthi uyamgeza.
Ushintsho lubuhlungu kodwa sekuyisikhathi sokuba inhlangano ilwenze ithanda ingathandi ngaphambi kokuthi kushaye unyaka wezi2019.
Zemuk’ inkomo magwala ndini!