UKUDINGISWA KOSOPOLITIKI AKUYONA I- QUALIFICATION
UMUNTU owatshela osopolitiki ukuthi bahlakaniphile, wayenza indaba.
Uke ufice umuntu owamshiya eshikiliswa wufestiya le eQambokwethu Primary School le ngakithi KwaDlangezwa - la okwakufunda khona izinkalakatha, oRev Mkhekhelezi - sekuthiwa useyikhansela.
Ngabe basekhona nje othisha bami omem’ Mnguni owayengifundisa ufestiya, uMrs Mncwabe owayengifundisa u-stende 1 noMrs Msweli umama kaQiniso owayengifundisa u-stende 2 uMiss Mthethwa owayezilungele nkosi yami.
Cha bakithi, thina esake sathi qu ekilasini, sesiyazicelela-ke manje ukuba abaholi bomphakathi njengamakhansela, yizimeya, ongqongqoshe kuze kufike kumengameli, makungathathwa umuntu ngoba nakhu enodumo lwesikhashana alubolekwe yinyanga yakhe yaseSwazini, avotelwe kuthiwe uyimeya.
Hhayi ngeke bakwethu, kayikho nhlobo i- fair la, umuntu angahlulwa wusekhendiya into engakhulumi bese kuthiwa makahole abantu abano- form 5, abanama- degree - ngikhuluma ngodokotela, amajaji, othisha - sikuyeke nje ukuthi kulesi sikhathi samanje kwabona othisha sekukhona abafundisa ngonembeza. Umuntu uphethe isikhundla kwaSadtu kodwa iziqu wazithenga kwaKFC njengamaqatha enkukhu! Sengiyabona nje umengameli ongenawo ngisho u- form 5, kufika ungqongqoshe oselove izinsuku ezintathu… Umengameli: “Uphumaphi weDlamini?”
Athi ukuthula uDlamini anwaye ikhanda… “Bengiphethwe yisisu mhlonishwa mengameli…” Anyuse izibuko zakhe ngomunwe ophakathi umengameli… athi ukudonsa intshebe yakhe…”
"Uyedelela Dlamini, nguwena kuphela onesisu njengoba uhamba usiqhoshela ngaso, ngizokurishafula, kawusenguyena ungqongqoshe wezempilo, usuzoba yilunga nje lephalamende futhi eliwunombolo 400.
"Uzohlala laphaya ezinqeni zendlu yephalamende, ungaphawuli lutho.” Kufike uMinister Masondo oselove kusukela mhla zingama-26 waze wabuya nge- payday elandelayo… Mengameli: “We Masondo, ucabanga ukuthi yikonyokokhulu la ephalamende lami?
"Uphumaphi…” Masondo (ezikhwehlelisa): “Ewu mengameli wena we- dinosaur, bengiphethwe yi- pneumonoultramicroscopicsilicovolcanoconiosis…” Ethuka: “Hawu ubungasho ngani, phindela ekhaya uyolala…”
Usho nje unkabi usedidwe yileli gama abonayo ukuthi uma eke wazama ukulibiza, uzoshaywa yistroke futhi uyabona ukuthi uma elokhu ebuza imibuzo eminingi uzovela ukuthi uyihlathi elingazi ngisho no-A indlu yenja eyazibonelwa nguVusi Ximba wazidlulela emhlabeni.
Le genge okuthi uma ixakwa ngama- debate emihlanganweni kamasipala nasephalamende, uyibone ivusa izinhloze sengathi yiwolf ibona inyamazane enemilenze emibili, ibhoke ngolaka isho nokusho ukuthi yona yelusa, iyazifikela endodeni.
Umuntu usho njalo nje, bekuthiwa makachaze ukuthi usewenzeleni umphakathi awuholayo. Mangilibeke nje ngembaba bakwethu, kasibafuni laba baholi abaqokwa ngobungani, ngobu- girlfriend nobu- boyfriend nangobu- comrade.
Iyahlupha-ke le genge eqokwa ngokuthi yashizila ekudingisweni, umuntu ufika la kade egolozela amaselesele azidlalela ema-swimmingpoolhole le emigwaqweni yaseBujumbura - ongafihla kuyona inkomo yonke ingatholwa muntu - bese becabanga ukuthi bazogolozela nathi. Kabafuni futhi ukuphikiswa nokuboniswa laba bantu! Uzwa sebekutshela ukuthi u-Oliver Tambo wathi, uMandela wathi… uze uxakeke-ke ukuthi manje kumele ilanga licishe yini uma kuwukuthi uMandela wathini.
Amaqembu ezepolitiki ake nje ayeke manje ukusijwayela kabi, asikhethele amakhansela ngoba nakhu umuntu ubesohlangothini lukabasinibani ngesikhathi kukhankaswa, sifuna abaholi abaziyo ukuthi abantu badingani.
Buka nje izwe selize layoshuthekwa emgqonyeni kadoti kwezomnotho ngenxa yakho njalo belu ukuholwa ngama-political and social Stevie Wonders.
Uzwe omama nobaba abadala bempongoloza bethi izwe njengoba lingene emgqonyeni kadoti bazolikhipha.
Bazolikhipha kanjani izwe emgqonyeni kadoti besahlulwa wukuzikhipha bona esilingweni samaphakethe omunye umndeni wale eMbombayi… i-capital city yasesifundazweni iMaharashtra kwelikaGandhi?
Singabantu kumele sikuvume ukuthi siyizimpisi ezadlelwa intombi yimpungushe ngenxa yokubhayiza - funda umasihambisane ibanga 3, oluhlaza nga- phandle.
Kufana namakhosi, kuvele kubekwe ihuzu nje elabaleka lisuka ngakithi KwaDlangezwa layohlala eSinqobile ihostela laseSikhawini - liqambe amanga lithi belisekudingisweni - bese kuthiwa liyinkosi ngoba uyise wayeyinkosi… gede mani.
Ngubani ngempela owathi ukudingiswa lokhu yi- qualification yokungena kuhulumeni? Laba bantu abadingiswa abasiyeke phansi, nathi esasisele la, sasithwele kanzima futhi-ke ake bangixoxele nje noma-ke nje ngeKwaDlangezwa First War abake bayilwa njengoba behlala besibelese ngokudingiswa sengathi ukudingiswa kuyimali yesinkwa - phela izingane uma zifuna imali yesinkwa zenza njengalabo sopolitiki basekudingisweni, ziba yiphela endlebeni…
“Imali yesinkwa mama, we mama iphi imali yesinkwa… Sicela imali yesinkwa we mama…” uyoze uyikhiphe.
Nathi-ke sesize sadela yilesi sifundo senu iDingiswiology, ongaze ufunge ukuthi uma uphase sona, usukwazi ukwakha i- spacecraft esihamba u-1000km/m!