UBaxter ufuna ukuvalelisa i-SuperSport ngeseNedbank
SIMNUKELA ekhaleni isicoco seNedbank Cup umqeqeshi weSuperSport United osesalelwe yimidlalo emibili kuphela bese eyashiya kule kilabhu.
ISuperSport ifinyelele kowamanqamu weNedbank iguqisa ngo-4-2 wamaphenathi iChippa United ngoMgqibelo ntambama eSisa Dukashe Stadium.
Umdlalo ubuphele zibambene ngo-00.
UStuart Baxter oqeqesha iSuperSport usethubeni lokuvikela lesi sicoco bese eyahamba njengoba eseqashwe njengomqeqeshi weBafana Bafana.
Usalelwe yimidlalo emibili kwiSuperSport okungowamanqamu weNedbank noweli- gi azowugijima nePlatinum Stars ngoMgqibelo ngo-15h00 eLucas Moripe Stadium, e-Atteridgeville.
UBaxter uthi le nkomishi imnukela ekhaleni.
“Angijabulile kahle hle njengoba ngizohamba ngingayinqobile inkomishi yeligi neSuperSport okuyinto ebengiyifuna.
Kodwa-ke ngizimisele ngokubashiya nale nkomishi yeNedbank.
Ithuba sinalo angivamisile ukuhlulwa kweyamanqamu. IChippa isinike umdlalo omnandi.
Benginovalo ngayo ngoba bese ikhombisa ukubuyelwa wukuzethemba njengoba kubuye umqeqeshi wayo.
Kodwa-ke ngijabulile ngoba sigcine sifinyelele kowamanqamu yize kube ngamaphenathi,” kusho uBaxter.
UDan Malesela ocija iChippa uthi babe neshwa kulo mdlalo bekufanele bawunqobe.
“Lo mdlalo bekungafanele uye emaphenathini sakhe amathuba kodwa sangawasebenzisa.
Amaphenathi-ke angawinwa yinoma ngubani akekho ongakwazi lokho.
Ngijabulile ngendlela esidlale ngayo abalandeli sibabukise ibhola eliseqophelweni eliphezulu,” kusho uMalesela.