Inzondo mayingabi yifa kwi- EFF
MHLELI: Iqiniso sifanele ukulikhuluma ngisho nangesikhathi lapho abantu sebelawulwa yizisu zabo kanye nalapho abanye sebadayisa nangalo. Ngifisa ukubheka kakhulu udaba lwakamuva oseluqubule ukukhuluma mayelana nomfelandawonye wamaqembu aphikisayo, obizwa ngeNational Foundation Dialogue Initiative.
Kuyezwakala ukuthi kunomhlangano wokuqala wale mbumba yamaqembu, obuseParktown, eGoli lapho abanye bosaziwayo abebeyingxenye yawo bekunguMnu Thabo Mbeki, uMnu FW de Klerk noMnu Kgalema Motlanthe.
Okungiphatha kabi wukuthi abafowethu be-Economic Freedom Fighters (EFF) bamane baduba, bashingila, bashiya lo mhlangano ngenxa yokungahambisani nokuba khona kukaMnu De Klerk kulo mhlangano.
Kuyagqama ukuthi ngokomlomo kaMnu Mbuyiseni Ndlozi okhulumela i-EFF, uthi bakhononda ngokuthi uMnu De Klerk waba neqhaza kuhulumeni wobandlululo, okwaphetha ngokuba angajeziswa. Manje-ke, ngibuka ukuthi le ndlela yokubuka izinto ngamagqubu nangenzondo, izosithwalisa kanzima ezweni ngoba kuyosho ukuthi siyophila ngokukhumbuzana osekwadlula.
Mhlawumbe kuhle ngicacise ukuthi kanginalo igqubu kumbe inzondo nge-EEF, ngiyayamukela emicabangweni yami yonke njengeqembu elinesizathu sokuba libekhona embusazweni wakithi. Ineqhaza elikhulu esilibambile ekuvaleni amanye amagebe nokwakha amasu okunyakazisa umbuso weANC osihleli entanyeni sonke kuleli lizwe, ikakhulukazi uma ungelona ilunga layo.
Nokho-ke, lapha odabeni lwabe-EFF, bengifisa udaba lukaMnu De Klerk lungabukwa ngamanye amehlo, hhayi lawa awenzondo ngenxa yokuthi kumele siqonde ukuthi uMnu De Klerk wangena esikhundleni sobumengameli ngenxa yesibindi nekhono lakhe njengalokhu isimo sombusazwe ngaleso sikhathi sabe sinezinselelo eziningi. Ezinye zazo kwakuyilezi ezilandelayo :
Isimo sodlame ezweni nemibhikisho engapheliyo.
Ingcindezi yamaqembu aphikisayo nezinhlangano zemiphakathi eyahlukeneyo.
Isimo esintekenteke sezinga lomnotho nezinga lobumpofu, ikakhulukazi kwabamnyama.
Umphakathi omhlophe owabe uphikisana nombono wezinguquko zombusazwe wakuleli.
Nesimo senhlukano ngaphakathi eqenjini elalibusa ngaleso sikhathi, iNational Party (NP). Ngaleyo ndlela lesi simo sasidinga umholi onomqondo okhaliphile kwiNP ukuba akwazi ukuhola uhulumeni ezingxoxweni zezinguquko embusazweni wakuleli, okwaphetha ngokuba kube ngubaba uDe Klerk.
Ngiyacabanga ukuthi simelwe ukumbonga ngeqhaza alibamba, ikakhulukazi ngo- ba ukumgxeka kungaba lula ngaphandle kokubheka isimo ayebhekene naso ngaleso sikhathi. Kumele singakhohlwa yizinhlamba ayethukwa ngazo ngabanye abamhlophe, ababembiza ngomdayisi ngoba bebona sengathi usecheme nabamnyama njengalokhu wayephumela obala ngodaba lombuso wentando yeningi esho nokusho ukuthi isikhathi sesifikile ukuba lokho makwenzeke.
Siyokhumbula nanokuthi eminye yemihlangano babemane bayidube ngenxa yeqeqebana lontamolukhuni ababengafuni nakuyizwa eyokuhlala kuxoxwe ngezinguquko ezweni. Manje-ke, uMnu De Klerk kumele sikhumbule ukuthi naye wabe eyinzalo yabo futhi ekhuliswe wadla izithelo zobandlululo nabo kodwa lokho kakumvimbanga ukuba abone ngendlela eyaphetha ngokuba amandla aweliselwe ezandleni ezintsha ngaphandle kombhobho wesibhamu njengoba abanye babefisa kanjalo.
Kufanele singakhohlwa ngabanye abaholi ababamba iqhaza kule nkululeko yethu, njengobaba iNkosi Mangosuthu Buthelezi eyayichitha eyokufumana amandla ombuso ngezikhwepha nezikhali, kodwa kunalokho wayebelesele ngodaba lokuxazulula izinkinga zombusazwe ngokuxoxa, okuyilona khambi elashabalalisa umbuso wobandlululo.