I-PIRATES YTHEMBE IMBOBO YENALITI
Izibona isengapulukutshela kwi-top 8
UMQEQESHI we-Orlando Pirates, uKjell Jonevret, usanethemba lokuthi ezakhe zisangaligqiba ihlazo zingene ngembobo yenaliti kwitop-8.
IBucs izodudulana neLamontville Golden Arrows kowokusonga i-Absa Premiership ngoMgqibelo ngo-15h00 eMoses Mabhida Stadium, eThekwini. La makilabhu atholana nje, ngeledlule abebhekene kwi- semi final yeNedbank Cup kwagu-qa i-Arrows ngo-1-0 ePrincess Magogo Stadium, KwaMashu.
Njengoba etholana nje, womabili alwela indawo kwi-top 8 kwazise izibalo zisawavuna. Kusele izindawo ezimbili kuphela kwi- top 8 ezisabanjwe yiMaritzburg United esendaweni yesi-7 ne-Ajax Cape Town esendaweni yesi-8.
Ukuze iPirates ingene kwi- top kufanele yehlule i-Arrows ngamagoli ayisihlanu bese imincela ukuthi i-Ajax nePlatinum Stars bahlulwe.
Ne-Arrows ngokunjalo kufanele ihlule iPirates bese imincela ukuthi iMaritzburg ne-Ajax bahlulwe. Iqiniso elibuhlungu kula makilabhu wukuthi eyodwa yawo ngeke iyithole indawo kwi-top 8 ngoba njengoba ebhekene nje kawakwazi ukunqoba womabili. Nokho kubukeka kuzokuba nzima ukuthi kwenzeke futhike kungenzeka wo- mabili angayinuki i- top 8 njengoba iMaritzburg ne-Ajax benemidlalo ebukeka bengayinqoba.
IMaritzburg izobhekana neBloemfontein Celtic ngoMgqibelo ngo-15h00 eHarry Gwala Stadium, eMgungundlovu, i-Ajax idudulane neBaroka FC ngoMgqibelo ngo15h00 eCape Town Stadium.
UJonevret uthi ebholeni kwenzeka izinto ezingakholakali njengoba muva nje iBarcelona yaseSpain ihlule iPSG yaseFrance ngo6-1 kowe-Uefa Champions League. I-PSG ibinqobe ngo-4-0 isekhaya okwenze yagcina iguqe ngo-6-5 uma kuhlanganiswa amagoli emilenze emibili.
“Ebholeni kudala ngaba khona, kawuliphonsi ithawula unondwe- ba engakawuqedi umdlalo. Sesibone izinto ezingakholakali zenzeka ebholeni ngakho-ke nami kangililahlile ithemba nge-top- 8. Uma ubheka nje kule sizini iSundowns beyisele ngemidlalo eminingi kungathi izoyinqoba iligi kodwa yagcina ilahle inqwaba yamaphuzu, iBidvest Wits yaba yizingqwele.
"Nathi-ke sizokulwa okokugcina kulo mdlalo. Sizokhipha wonke amandla esinawo,” kusho uJonevret.
UClinton Larsen ocija i-Arrows, uthi nabo bayigaqele i- top 8 ngakho-ke ngeke bayiyeke iPirates izenzele.
“Uma ubheka emdlalweni odlule sizenzele thina phansi ikakhulu- kazi ngesiwombe sokuqala sabanika intuba yokudlala sangabacindezela.
Sifundile emaphutheni ethu kulo mdlalo owedlule, siyakwazi okufanele sikwenze. Lo mdlalo uzokuba mnandi ngoba nathi siyayidinga i- top 8,” kusho uLarsen.
Amathikithi omdlalo we-Arrows neBucs atholakala eTicketPro eJet nase-Edgars, ePost Office, eSpar kanti abiza u-R40 awabantu abadala kuthi awezingane atholakale ngo-R10.
Isiyonke imidlalo ye-Absa Premiership yokusonga isizini yezi2016/17 iqhathwe kanje:NGOMGQIBELO EFNB Stadium: Kaizer Chiefs vs Bidvest Wits 15h00 (SS4).
ECape Town Stadium: Ajax Cape Town vs Baroka FC 15h00 (SS9).
ELucas Moripe Stadium: SuperSport United vs Platinum Stars 15h00.
EMoses Mabhida Stadium: Golden Arrows vs Orlando Pirates 15h00.
EGoble Park Stadium: Free State Stars vs Chippa United 15h00.
EHarry Gwala Stadium: Maritzburg Utd vs Bloemfontein Celtic 15h00.
E-Old Peter Mokaba Stadium: Polokwane City vs Cape Town City 15h00.
EMakhulong Stadium: Highlands Park vs Mamelodi Sundowns 15h00 (SS3).