Isibhicongo iveni ligingqa abafundi
Bebengaphezu kwama-20
KUBANJWE umoya ngesimo sabafundi baseNkandla, maphakathi neKwaZulu-Natal, okubikwa ukuthi balimale kanzima ngesikhathi kugingqika iveni abebelikhwele bevela esikoleni ngoLwesibili ntambama.
Kuthiwa kucishe kwavalwa ngehlahla kulesi sibhicongo, okubikwa ukuthi senzeke emgwaqweni uP 707 eQhudeni khona eNkandla. Leli veni kubikwa ukuthi belilayishe abafundi abangaphezulu kwabangama-20 basezikoleni ezahlukene, okubalwa kuzona iNgwekazi High School, iSJ Baloyi Secondary neGubazi Primary School.
Oyedwa wabafundi baseGubazi Primary, uThando Zondi, obefunda uGrade 4, ushonele endaweni yesigameko. Ngokuthola kwe
abafundi abasindile baxilongwa esibhedlela saseKhombe, eNkandla kanti abanye babo kuthiwa kabakwazi ngisho ukukhuluma ngenxa yokulimala kanzima.
Umthombo waleli phephandaba uthi iveni beligijima kanti nesibalo sabagibeli besingaphezulu kwesibekiwe.
“Le ngozi kasiyazi yenzeke kanjani kodwa kukhona abathi beyigcwele kakhulu iveni kanti umshayeli wehlulekile wukulilawula laphenduka nazo izingane. Omunye umthombo weLANGA ofike kuqala endaweni yesigameko, uthi leli veni kalisebenzi umsebenzi wokuthutha izingane kodwa yizona ezilimisile zacela ukugibela.
Utshele leli phephandaba ukuthi ufike isimo sabafundi sibucayi kakhulu zingakwazi nokukhuluma, ezinye kusalindeleke ukuba zihlinzwe zikhishwe amabhodlela angene emzimbeni kanti ezinye zishayeke kanzima emakhanda.
“Kusenzima ukwazi kabanzi ngoba umshayeli walo naye akakhulumi, ulimele kakhulu. Wehluleke wukulawula iveni lakhe kanti nomgwaqo wethu mubi kakhulu. Yimina obetatulula abafundi kuwubuginqiginqi begcwele umgwaqo,” kusho umthombo.
Kuthiwa abafundi abali-11 bafunda eSJ Baloyi Secondary kanti kasikatholakali isibalo sabakwezinye izikole. Uveze nokuthi imoto iphenduke yaze yayophonseka odongweni oluseduze komgwaqo okwenzeke kuyona ingozi.
INkosi Mbangiseni Dlomo, yesi- zwe sakwaDlomo kuyona le ndawo, igxeke kakhulu ukudembesela komnyango wezemfundo ekulekeleleni abafundi ngezithuthi. Ithi kawekho nhlobo amabhasi athutha abafundi bezikole ezili-10 ezisendaweni yayo kanti isikhulume yaze yakhathala ngale nkinga.
"Lolu daba ngilubike kakhulu kubahloli ngoba nabazali bekhala ngokuthi izingane zihamba zicela ukugibela ezimotweni zabantu ngenxa yobude bendlela. Ngikhuluma nje, ngisehhovisini lomhloli omkhulu eNkandla ngizomtshela ngalo mphumela osuwenzekile emuva kwesikhathi eside ngifaka isicelo sokulethelwa amabhasi,” kusho iNkosi Dlomo.
Ithi indlela abafundi abalimele ngayo, iyethusa. Inkosi itshele leli phephandaba ukuthi yimoto yayo elekelele i-Ambulensi ekuthutheni izingane ngesikhathi ziphuthunyiswa esibhedlela njengoba kule ndawo kusetshenziswa eyodwa nje vo (i-ambulensi).
“Le ngane eshonile sithole ukuthi yiyona ekhafulwe kuqala yimoto yase iyilandela ngemuva yalala phezu kwayo. Nezimvula zibenomthelela kule ngozi ngoba kuvuleke imigodi emgwaqweni, eyenza izimoto zihambe kanzima,” kuqhuba inkosi.
Okhulumela uMnyango wezeMfundo KwaZuluNatal, uMnu Scelo Khuzwayo, uthi bazwelana kakhulu nomndeni oshonelwe kanjalo neyabafundi abalimele.
“Ungqongqoshe ufisela abafundi ukwelulama ngokukhulu ukushesha njengoba kuyisikhathi esinzima kanjena salo nyaka,” kusho uMnu Khuzwayo.
Ebuzwa ukuthi kwenziwa yini ukuba lezi zikole zinga- hlinzekwa ngamabhasi njengazo zonke izikole, uthe bayakuqonda ukuthi kusenezikole ezinale nkinga. Uthe bazokwenza uhlelo lokuzibhekelela lezo ezisaswele.
Okhulumela amaphoyisa KwaZulu-Natal, uColonel Thembeka Mbhele, usiqinisekisile isigameko sengozi nokushona komfundi oyedwa oneminyaka eli-11 ubudala.
Uthe abalimele kanzima basaxilongwa esibhedlela kanti icala lokubulala ngokungehloso liphenywa ngamaphoyisa aseKhombe.
Kwenzeka le ngozi nje, vele iKwaZulu-Natal ihlaselwe yifu elimnyama kwezokuthutha njengoba ngoMsombuluko kubulawe uMnu Roynold Stephens obengusihlalo kasoseshini weDolphin Coast, KwaDukuza, ogwini olusenyakatho yeKwaZulu-Natal.
Lokhu kwenze ukuba izinhlangano okubalwa kuzona iNkatha Freedom Party (IFP) zizwakalise ukukhathazeka kwazise kufe abanye abantu abahlangene nemboni yezokuthutha KwaDabhasi, Kwa- Nongoma, enyakatho yeKwaZuluNatal.
I-IFP inxuse ukuba kwenziwe uphenyo olunzulu ukuze kuqedwe izibhamu ezingekho emthethweni okuthiwa yizona ezisetshenziswayo ukubulala abantu ematekisini.
“Sinxusa uNgqongqoshe wezokuThutha, uMnu Mxolisi Kaunda, ukuba asungule ithimba elizobhekana nodlame ematekisini. Kumele akhuculule izibhamu ezibulala abanikazi bamatekisi nozihlalo bososeshini njengoba kubukeka le nto yokuqothwa kwabantu ngenhlamvu iqhubeka"‚kusho okhulumela i-IFP kwezokuthutha kulesi sifundazwe, uMnu Steven Moodley.
Uthi kubalulekile ukuba amaphoyisa angenelele ngokukhulu ukushesha, aphenye ukuze kwenziwe ubulungiswa.
"Siyi-IFP sifuna kube nengqungquthela ephuthumayo okuzobhungwa kuyona ngalolu dlame lwasematekisini kanjalo nezibhamu ezingekho emthethweni. Lokhu kungaba yisinyathelo esiphathekayo esingaxazulula siphinde senze imboni yamatekisi ibumbane,” kusho uMnu Moodley. I-IFP idlulise okukhulu ukudabuka emindenini elahlekelwe.
Yimina obetatulula abafundi kuwubugingqigingqi begcwele umgwaqo kusho...