Basengcupheni yokuwelwa wuphahla
Sineminyaka engama-45 sakhiwe
BAHLAFUNA bejeqeza kuhle kwezinyamazane othisha baseNsingweni Primary School, eGingindlovu, ogwini olusenyakatho yeKwaZulu-Natal njengoba isikole abafundisa kusona singawa noma kunini ngenxa yokubheda kwesimo saso.
Lesi sikole esigcina ebangeni lesi-7 - esakhiwe wumphakathi eminyakeni engama-45 edlule - kunovalo lokuthi singawa noma yinini simboze izingane njengoba udonga lwaso luwohloka kanti naphezulu siyavuza. Othisha balesi sikole bayaphoqeleka ukuba izingane baziphindisele emakhaya uma izulu linile ngoba amanzi agcwala kuwona wonke amagumbi okufundela.
Izincwadi zokufunda uma linile zikhishelwa emnyango ziyonekwa ngoba zisuke sezivuza, amakhasi azo esezidabukela. Ngokuthola kweLANGA ngekhansela lale ndawo, uNkz Mavis Mdluli, abafundi bamabanga angafani sebefakwe egunjini elilodwa kwa- zise kunamagumbi angasasetshenziswa ngenxa yovalo lokuthi azobhidlika kunezingane ngaphakathi. “Lokhu kuhlanganiswa kwabafundi abangama-50 egunjini elilodwa, kuyakuphazamisa ukufunda nokufundisa.
"Ugesi kawusasebenzi nhlobo kulesi sikole njengoba la manzi axhaxhaza phezulu egcina esethinta izintambo bese uyacisha. Uma kunomoya, ubona ngezingane sezibuya ngoba kwesatshwa ukuthi zingase zibhidlikelwe wudonga.
"Kusukela ngowezi-2009 uthishanhloko walesi sikole ehlangene nabazali babhalela umnyango bacela ukulungiselwa isikole kodwa izicelo zabo ziwela ezindlebeni zezithulu. Kasazi noma balindele ukuba kuze kuphume imiphefumulo yalaba bantwana yini kuyima besukuma.
"Sicela uNgqongqoshe wezeMfundo KwaZulu-Natal, uMnu Mthandeni Dlungwane, angenelele kungaze kuphume izidumbu,” kusho uNkz uMdluli. ILANGA liyozibonela isimo salesi sikole ngoLwesibili, lifike ehhovisi likathishanhloko ongathandanga ukukhuluma nalo i- ceiling board ilenga phezulu, kucaca ukuthi ingawa noma nini. Ikhompyutha esehhovisi lakhe isibekwe yabhekiswa ngasodongeni, isusiwe etafuleni ebihlala kulona ngenxa yokuthi kwalona ihhovisi liyavuza.
Ngokusho komunye wabazali - esingeke simdalule ukuvikela ingane yakhe efunda kulesi sikole - izingane zabo zihlala ngokugula ngenxa yalesi simo.
“Amagumbi alesi sikole akhiwe ngo- asbestos njengoba usugugile, uvuza, ugcina usukhipha izimpephesana ezenza izingane ziphathwe yisifuba.
"Sihlale sigqigqa emtholampilo njengoba izingane zethu zihlale zikhwehlela ngenxa yesimo salesi sikole,” kusho umzali. Okhulumela uMnyango WezeMfundo KwaZulu-Natal, uMnu Muzi Mahlambi, uthe udaba lwalesi sikole belungakaze lufike kubona kodwa bazothumela ithimba lezisebenzi zabo ezikulesiya sifunda ukuba ziyobheka isimo bese bebona ukuthi kungalekelelwa kanjani.