INKOMBANKOMBANE NGOKUQOKWA KWEMENENJA KAMASIPALA
ADUBE umhlangano ngeledlule amakhansela eNkatha Freedom Party (IFP) naweDemocratic Alliance (DA) kuMasipala waseDumbe, enyakatho yeKwaZulu-Natal, ecikwa wukuqashwa kwemenenja kamasipala ngaphandle kokwazisa ngayo.
Le memenja entsha enguMnu Raymond Mnguni, izongena esikhundleni sikaMnu Thabani Mkhi- ze osule kulo masipala ngenyanga edlule. La makhansela ayisi-8 kwayisi-16 esewonke, athi afunziwe uMnu Mnguni kwazise kawazange abone ngisho i-CV yakhe.
Ngokusho kwelinye lamakhansela igama lalo esiligodlile emhlanganweni wesigungu samakhansela abebenawo, kuvele ukuthi kakusebenzeki kumasipala uma imenenja ingekho ngoba kukhona amaphepha adinga ukusayinwa yiyona ngaphambi kokuba kube nokwenziwayo.
“Kulowo mhlangano baphakamise igama leChief Financial Officer (CFO) nelemenenja yakwaCo-operative Services ukuba kukhethwe kuwona ibamba lemenenja.
Ngokubona ukuthi akekho kubona okulungele ukuba yimenenja ngokwesipiliyoni sabo, sibe sesithi makucelwe umnyango (wezokubusa ngobambisana Kwa-Zulu-Natal, oholwa nguNgqongqoshe Nomusa Dube-Ncube) usisize ukhombe umuntu ongaba yimenenja.
“Kuthe sisalinde impendulo emnyangweni, kwaqhamuka uMnu Mnguni esezokwethulwa njengemenenja entsha. Kasazi nokuthi injani iCV yakhe, kasazi ukuthi yenziwe ngubani inhlolokhono njengoba eseqashiwe nje.
“Sibatshelile ukuthi ngeke siyemukele le menenja njengoba singazi nokuthi sithini isipiliyoni sayo nokuthi ivela kuphi.
Bathi ngeke bakwazi ukusikhombisa iCV yayo, thina nje okwethu wukuba sazi ukuthi sesinayo imenenja kamasipala. Sivele saduba umhlangano ngoba le nto abayenzayo kasikaze siyibone, siyiqala la eDumbe,” kuchaza leli khansela.
UMnu Majuba Mavuso oyimeya yaseDumbe, uthi kungamanga ukuthi kabazange bavumelane ngokuqashwa kwemenenja. Uthi babe nomhlangano wesigungu samakhansela baphakamisa amagama abantu abangaphakathi kodwa amanye amakhansela awenqaba.
“Sivumelane ngokuthi masicele ungqongqoshe asisize asifunele imenenja. Nempela uyilethile, nathi kasikaze siyibone iCV yayo njengoba ungqongqoshe eyithathe kulaba bantu bakhe abafaka njengabalawuli komasipala abanezinkinga.
“Le menenja ekhona kayiqashiwe ngokugcwele, izobamba izinyanga ezintathu njengoba kumanje sisematasa samukela izicelo zomsebenzi kubantu abafuna sona lesi sikhala. Sizothi singaqeda bese kwenziwa inhlolokhono. La bantu abathi kabayifuni le menenja, besinabo emhlanganweni kwasho bona ukuthi ungqongqoshe makasifunele.
Kulo masipala sinenkinga yamakhansela asijabulelayo lesi simo umasipala okusona, sokushoda kwezimali. Zonke izinhlelo zokukhipha lo masipala kulezi nkinga esithi siyazizama, ayazikhahlela,” kusho uMnu Mavuso.
Uthi kumanje bazama izindlela zokunciphisa izisebenzi ukuze kongiwe imali njengoba zingama-43% esikhundleni sama-40%.
Wu-R3.8 million athi uchithwa wumasipala ukukhokhela izisebenzi njalo ngenyanga. Lo masipala sifike uqashe izimoto ezili-18, uzikhokhela u-R380 000 ngenyanga kodwa ezinye sesiziphindisele emuva kwasala eziyisi-6 ezikhokhelwa u-R163 000 ngenyanga ngoba sifuna ukwehlisa izindleko.
Sinesikweletu sika-R32 million okufanele sisikhokhe esenziwe singakangeni nokungena ezikhundleni. Noma bengaphikisa zonke izinto esizenzayo sizoqhubeka nokuhambisela abantu intuthuko ngoba kasiqashiwe yibona, siqashwe wumphathi,” kusho uMnu Mavuso. UMnu Mnguni usevela eDumbe nje, uke waba yimenenja eMthonjaneni lapho ahambe khona kungasekuhle.