Ugwaze iphoyisa kubangwa umgwaqo
Belisabuka umonakalo emotweni yalo
USASHAQEKILE umphakathi waseMbazwana, KwaMhlabuyalingana, enyakatho-mpumalanga yeKwaZulu-Natal ngesehlakalo sokuhlaselwa kugwazwe iphoyisa emuva kombango womgwaqo ngoMgqibelo.
UConst Mduduzi “Dubula” Gumede (33), ungeniswe kwesinye sezibhedlela zaseThekwini kukubi emuva kokugwazwa amanxeba amabili ekhanda nguMnu Celumusa Masuku (19).
Wehlelwa yilo mshophi nje, ubehamba ngemoto yakhe ephuma emsebenzini elibangise kubo oLakeni, khona eMbazwana, njengoba bekunomsebenzi wesintu. Kubikwa ukuthi uhlangane noMnu Masuku naye obehamba ngemoto. Indaba isuke sekufanele lezi zimoto zidedelane kwazise indawo ebezihamba kuyona kayiyinhle.
Ngokusho komthombo osondelene nalolu daba, umsolwa wenqabile ukudedela leli phoyisa, lagcina ligudla izihlahla nezinguzunga zamatshe.
Lokhu kuholele ekubeni imoto kaConst Gumede ilimale, okuthe uma ema ebheka ukuthi umonakalo ungakanani, wabhozonyelwa nguMnu Masuku obengasadle nkobe zamuntu, wamgwaza.
“Ngendlela okwenzeke ngayo, umfowethu (uMnu Gumede) engizalwa naye emndenini, uvele wakhohlwa ngisho yisibhamu somsebenzi obekufanele asisebenzise ngoba phela kusho ukuthi umsolwa ubevele emcuphile njengoba emzume ebheke phansi. Kasazi ukuthi kumanje kuzophetha kanjani ngempilo yomfowethu esibhedlela eThekwini,” kusho umthombo.
ILANGA lixoxe nephoyisa elingagunyaziwe ukukhuluma nabezindaba esiteshini samaphoyisa aseMbazwana eliveze ukuthi kakusona esokuqala lesi sigameko sokuhlaselwa kwephoyisa.
“Sisebenza kanzima lapha eMbazwane, sidelelwa ngabafana abancane ngoba bethembe ukuthi umthetho wezwe uyabavikela. Ukuba uDubula uziphindisele nje, ngabe usenkingeni kumanje ngoba uhlaka olusingatha amacala abhekene namaphoyisa, i-Independent Police Investigative Directorate (IPID), beluzobhekana naye.
“Abanye bagabisa ngokuthi banemithi yokulumba lapho beshaywe khona.
Konke lokhu ngeke sikubekezelele thina ngoba kwehlisa isithunzi sethu. Ukugwazwa kwalo mfana esisebenza naye kwe-nza siphelel- we ngonembeza nathi.
“Kumanje kuvuleke isikhala emsebenzini,” kusho leli phoyisa. Okhulumela amaphoyisa KwaZulu-Natal, uCapt Nqobile Gwala, uthi amaphoyisa aseMbazwane aphezu kophenyo. Uthe kuvulwe icala lokugwazwa kwephoyisa ekhanda langeniswa esibhedlela kukubi.
“Kuboshwe umlisa (19) ngecala lokugwaza iphoyisa ekhanda, kumanje lisesibhedlela.
“Umsolwa uvele kafushane eNkantolo yeMantshi yasoBonjeni ngoMsombuluko. Icala lihlehlele usuku olungaziwa ukuba afake isicelo sebheyili,” kuphetha uGwala.