Ubonga ILANGA othole umfundaze
Uthembisa ukuphasa ngamalengiso
UBONGA amandla ephephandaba ILANGA umfundi othole umfundaze esikhwameni sikaNdunankulu waKwaZulu-Natal, ukuze ayokwenza izifundo zeB-Com Accounting e-University of Cape Town.
ILANGA like labika ngoWandile Sithebe (18) waseNewcastle, enyakatho-ntshonalanga yeKwaZulu-Natal, othole o-A abayisi-7 no-B kumatikuletsheni.
Ubefunda ePhendukani Full Service High School. Ngenxa yokuphasa kahle, uphume isibili kuMasipala wesiFunda aMajuba.
Utshele ILANGA ukuthi ujabule ngokuthola umfundaze ovela ehhovisi likandunankulu kwazise ubengazi ukuthi uzothathani ayihlanganise nani njengoba ebengenayo imali yokufunda.
Ubonga iphephandaba ILANGA ngokumsiza athole lo mfundaze, ngaphandle kwalo uthi ngabe usephenduke ujikanelanga.
“Ngiswele amazwi okubonga ephephandabeni ILANGA ngoba ngaphandle kwalo ngabe kangilu- tholanga usizo lomfundaze.
“Ngiyafisa ILANGA liqhubeke nomsebenzi walo omuhle wokusiza abantu abaswele. Leli phephandaba liyishintshile kakhulu impilo yami.
“Lesi yisiqalo sezinto ezinhle empilweni yami. Ngithathwe e-University of Cape Town ngingenayo imali yokufunda kodwa ngoba uNkulunkulu uyazihlela izinto, namhlanje ngiyafunda. Kusukela ebuncaneni bami bengiyithanda i-Accounting yingakho ngifuna ukuzimisela futhi ngiphumelele ezifundweni zami.
“Ngiphatheke kabuhlungu ngesikhathi ngingaqokwanga ukuba ngithole umfundaze kuMasipala waseNewcastle njengoba bengifake isicelo sawo. Benginethemba lokuthi ngizowuthola njengoba ngiphase ngamalengiso.
“Inhliziyo yami ivele yacwila emafutheni ngesikhathi ngibona isithombe sabafundi abathole imifunduze ephuma kulo masipala sivele kwelinye lamaphephandaba.
“Kangitholanga ngisho umyalezo oshoyo ukuthi isicelo sami kasiphumelelanga. Kuyiqiniso ukuthi uNkulunkulu usebenza emfihlakalweni. Ngiyajabula ngokuthola lo mfundaze ngoba ugogo ubengenawo amandla okungiyisa enyuvesi. Bekuyisifiso sami ukwenza lo mkhakha wemfundo ngoba nginothando lwawo futhi nginesiqiniseko sokuthi ngizophasa ngamalengiso,” kusho uWandile.
Uninakhulu kaWandile, uNkk Nomsa Vilakazi, uthe uswele ngisho amazwi okubonga njengoba umzukulu wakhe ethole umfundaze.
“Ngiyabonga ukungenelela kwephephandaba ILANGA ngoba ukuba kuthiwa kalizange lingenelele, ngabe umzukulu wami uduve ekhaya ngoba mina bengingenawo amandla okumyisa enyuvesi,” kusho uNkk Vilakazi.
UWandile uqale ukufunda ngoNhlolanja (February) kodwa umfundaze wakhe uze wawuthola ngoNdasa (March).
UMnu Ndabezinhle Sibiya, okhulumela ihhovisi likandunankulu, uthe kuyamjabulisa uMnu Willies Mchunu ukuthi uWandile uyafunda ngenxa yokungenelela kwakhe.