Imfundo mayihambisane nemfundiso
KUNEZINTO emhlabeni ezihamba ngazimbili futhi okungathi uNkulunkulu wazidala ukuba zingahlukani, uma kuke kwaba khona eyodwa kanti enye kayikho, isizwe siba senkingeni.
Bekufanele sikuthandazele uma kwenzeka kufika empilweni yethu kuhamba kukubili ngoba uma kukodwa, lokho kuyosho ukuthi izinsuku zakho ungumuntu sezibaliwe.
Ngiyazi ukuthi umfundi wephephandaba lethu ILANGA uyazibuza ukuthi yiziphi lezo zinto ezihamba ngazimbili. Kule ngosi yanamhlanje ngizothanda sike sibheke lezi zinto uNkulunkulu azidala ukuba zihambe ngazimbili.
Imfundo bekufanele ihambisane nemfundiso, ukuhlakanipha bekufanele kuhambisane nenhlonipho, ukuceba kufanele kuhambisane nobuntu. Ngeke-ke sakubalekela ukuthi kubuhlungu ukubona umuntu efundile kodwa indlela angabazi ngayo abantu, ubone nje ukuthi akayitholanga imfundiso yasekhaya.
Esikoleni bayokwenza ukuba uthole iziqu kodwa ekhaya bayokufundisa ukuthi kawuzona iziqu, ungumuntu njengabanye abantu. Imfundiso yasekhaya iyokwenza ukwazi ukwehlukanisa phakathi kwakho nezinto onazo.
Mhlawumbe nje futhi singasika elijikayo sithi ukuhlakanipha bekufanele kuhambisane nenhlonipho. Kuyihlazo futhi kuyadabukisa ukubona umuntu ohlakaniphile kodwa eluhlaza.
Ngeke sakubalekela ukuthi ukuhlakanipha kuyomenza umuntu ukuba abaphathe abantu kodwa maye kubantu abaphethwe ngumuntu ohlakaniphile kodwa engahloniphi; eluhlaza nje. Ubuhlakani buyokubeka esihlalweni kodwa inhlonipho iyokugcina kuleso sihlalo.
Ubuhlakani onabo buyokwenza abantu bakuvotele kodwa inhlonipho iyokwenza abantu bakuthandazele ukuba ungabe usasuka kuleso sihlalo. Sesiyela ngasekuphetheni le ngosi, singakushiyi ukuthi ukuceba nakho kwadalwa ukuba kuhambisane nobuntu.
Kuyolisiza ngani izwe ukuba nesicebi esinomkhaba omkhulu kodwa sibe singabasizi ngalutho abantu? Wonke umuntu obusiswe nguNkulunkulu ubusiseke ukubusisa abanye abantu. Siyingozi isicebi esingakwazi ukwelula isandla futhi nje bekufanele wonke umuntu emhlabeni onotho azibuze ukuthi ngisize bani noma obani engibasizayo ngalokho engi- nakho? Akekho noyedwa oyongena nezinto anazo egodini, zonke izinto onazo ziyosala ngaphandle kwethuna.
Uyothi ugqitshwa nje thina esisele ngaphandle siyobe sesizisebenzisa umathanda wena ungasekho. Kuyosiza-ke ukuba ufunde ukupha nokusiza abantu usaphila, uke uzwe ubumnandi bokubona abantu bebusiseka, besizakala ngezinto zakho usaphila ngoba vele nje uma uke wafa sesiphezu kwakho, sizozisebenzisa ngendlela esithanda ngayo wena ungeke usasho lutho.
Sesiyivala le ngosi, masithi nokuphakanyiswa bekufanele kuhambisane nokuzithoba. Ngisho kungathiwa usesikhundleni esingakanani kodwa bekufanele umazise nalo muntu olaphaya phansi ophethe imophu ekorobha.
Kuyokusiza ukuhlonipha abantu abalaphaya phansi ngoba kuyothi mhla impilo ikushaya, uwa uwela kubona, bayokunqaka. Akufanele nje uma uwa umane uthanqazeke phansi, uzwe abantu bethi nizwile ukuthi uGoliyathi uwile?
Uqaphele-ke ukuthi empilweni uma uNkulunkulu ekuphakamisa, ungalinge uhambise okukaGoliyathi ngoba nabo oGoliyathi bayawa ngelinye ilanga, kayikho inyoni endiza ingahlali phansi.