USATHANE UNTSHONTSHA OKWENZIWE NGUMDALI
11 KWABASEKORINTE 11:14
NGITHANDA ukuba sivulane amehlo ngokusebenza kukaSathane uma eqonde ukuzuza asebekholwa noma abasekukhanyeni.
Kuleli vesi sivezelwa ukuthi uSathane uyaziguqula azenze ingelosi yokukhanya ukuze akwazi ukuthumba abasekukhanyeni. Ngamanye amazwi, uyakwazi ukuzenza into angesiyona ukuze azuze labo abayiyona ngempela.
Empeleni uSathane yingelosi yobumnyama kodwa uyakwazi ukuvele ayeke lokhu ayikhona ukuze asebenzele entweni angesiyiyo. Untshontsha ukukhanya asebenze ngakho kodwa yena ebe engesikhona lokho kukhanya.
Into emenza antshontshe izinto ezidalwe nguNkulunkulu wukuthi yena akasiyena uMdali kodwa uyisidalwa sikaNkulunkulu. Wayengadalwanga enguSathane, wayengenye yezingelosi zikaNkulunkulu. Akukho nokukodwa nje okwadalwa nguSathane kodwa uhlalela ukuntshontsha osekwenziwe nguNkulunkulu bese esebenza ngakho.
USathane wantshontsha noma wathumba ezinye izingelosi zikaNkulunkulu okuyizona ezaguquka zaba ngamadimoni ngoba wayengenamandla okudala ezakhe. Ngamanye amazwi, uSathane uthatha lokhu okudalwe nguNkulunkulu, aguqule inhloso okudalelwe yona ukuze afeze izinhloso zakhe eziphambana noNkulunkulu emhlabeni.
Ukuze angenise kahle emhlabeni, wantshontsha amazwi ayewashilo uNkulunkulu kumuntu maqondana nokwakufanele ukuba akudle nalokho okwakufanele angakudli. Ukuba uNkulunkulu akakhulumanga lutho nomuntu, ngabe noSathane kawekho amazwi ayezowaguqula awenze umbuzo awubuza u-Eva ukuze amdukise ngawo.
Uma kuza evangelini, uSathane waphinda wantshontsha oyedwa kubona laba abebebizwe nguJesu ukushumayela ivangeli, okunguJuda. Wasebenzisa yena ukuba anikele ngoJesu kwababezombulala.
Kulezi zinsuku esiphila kuzona, sibhekene nenkinga enkulu yokuba uSathane asintshontshele abantu abebebizwe nguNkulunkulu ngempela ukushumayela ivangeli. Namuhla ivangeli elishunyayelwa yibona, kuphinde kube yibona abalilimazayo ngokwenza izinto eziphambene nalo.
Ensimini yase-Eden izinto zoniwa ngumuntu wesifazane owayenziwe nguNkulunkulu ukuba abe ngumsizi ka-Adamu kodwa uSathane wantshontsha yena wamenzisa okuphambeneyo.
Nanamuhla uSathane akakayiyeki indlela yakhe yokuntshontsha okukaNkulnukulu ukudukisa ngakho abantu emhlabeni. Maqondana nasebandleni likaNkulunkulu, sisabhekene nenkinga yokuntshontshelwa abantu abebethunyelwe ukusebenza ibandla ngokwezinkonzo ezibekwe kubona kodwa kuphinde kube yibona futhi okufa kubo ibandla. Kubaphostoli abali12, uSathane wantshontsha uJuda Iskarioti ukukhaphela uJesu.
Kakugcinanga lapho ngoba nasebandleni uqobo, waphenduka inkunzi yesela elaleba imali yomnikelo esikhwameni.
Sisesikhathini esinzima kakhulu lapho uSathane esintshontshela abantu abebeshumayela beqinisa ukuthi uJesu ukhona futhi beqinisa nokuthi unamandla apheleleyo kodwa yibona futhi namuhla asebekhuluma okuphambene nalokho ababethunywe khona ekuqaleni.
Abanye bantshontshwa ngempumelelo yezinto eziphathekayo, eziyizidingo empilweni kanti sekuwukuphuma kwabo kulokhu okuyikhona. Encwadini kaMathewu 4:110, kuvela uSathane ezama ukuntshontsha uJesu uqobo lwakhe ngempumelelo yasemhlabeni, ngesikhathi ethi kuJesu: “Uma uziwisa phansi ukhuleke kimina ngizakunika yonke into oyidingayo.” Lokhu kuyinkomba yokuthi uSathane uyakusebenzisa ukuphu- melela ukuba adukise abantu.
Kungakujabulisi ukuphunyeleliswa nguSathane ngoba ekugcineni uzolahlekelwa wukuphila okuphakade, lapho kuyobe kungasakusizi ngalutho ukuphumelela kwakho maqondana nokungena izulu. Encwadini yeSambulo 13 kuvela olunye uhlobo lokuntshontsha kukaSathane esebenzisa izimangaliso.
Kunezinkumbula zabantu ezintshontshwa ngezimangaliso zigcine seziphume ngokuphelele empilweni yevangeli. Kule ncwadi yeSambulo kuvezwa uSathane edukisa abantu ngezimangaliso kuze kwehle nomlilo ovela ezulwini, wehlele kubantu ukuze bacabange ukuthi uvela kuNkulunkulu kanti uvela kuSathane uqobo.
Kulezi zinsuku uduka kalula uma uzonda iZwi likaNkulunkulu kodwa uthanda izimangaliso ngoba uSathane uvele akunike zona akuphuce izwi.
Nasebandleni uqobo waphenduka inkunzi yesela elaleba imali.