Abaholi abacacise ngodaba lukaMolefe
OKWENZIWA wuhulumeni odabeni lokubuyiselwa kukaMnu Brian Molefe njengesikhulu esiphezulu kwa-Eskom kwenza sibuke indlela ocabanga ngayo, ukuthi abantu baseNingizimu Afrika bayiziwula. UMnu Molefe, obevele eyisikhulu esiphezulu kwa-Eskom, kakukapheli ngisho izinyanga eziyisihlanu efungiswe njengelunga lephalamende, gwiqiqi, usebuyiselwa khona.
Okusidida kakhulu nokwenza sibone uhulumeni wenza abantu bakuleli iziphungumangathi wukuthi zolo lokhu kuthiwe uMnu Molefe wesulile kwaEskom, nanguya eyohlala ephalamende esikhundleni sikaMnu Abram Mudau. Ungene ephalamende ngethikithi laseNorth West, okuyisifundazwe esiphethwe nguNdunankulu Supra Mahumapelo, okungakapholi maseko kade siphakamisa indaba yokugxumeka umfuziselo kaMengameli Jacob Zuma.
Kwale ngisho abanye abantu baseNorth West, okubalwa kubona noMnu China Dodovu oke waba ngusihlalo we-African National Congress (ANC) kulesiya sifundazwe, bekhuza.
Uphenduke isilima uMnu Dodovu uma ecebisa uMnu Molefe ukuba angalinge avume ukuthatha isikhala sikaMnu Mudau ephalamende. Uqale waveza ukuthi kabamazi uMnu Molefe ukuthi uvela kuliphi igatsha le-ANC eNorth West. Nakhona lapho uvele wanuka iqaqa kwabanye be-ANC khona eNorth West nakwezinye izifundazwe.
UMnu Molefe kubuye kwathiwa uthathe impesheni eyiklume, kwabuye kwathiwa empeleni ubeselivini engakhokhelwa! Abaholi - okubalwa kubona noDkt Baldwin “Ben” Ngubane nezikhulu zikahulumeni - kumele bacacisele izwe ukuthi mhlola muni lo ogilwayo. Kasiboni kunobulungiswa ukunakashelwa kukaNgqongqoshe wezamaBhizinisi kaHulumeni, uNkk Lynn Brown, athwaliswe ijoka, kukhonjwe yena ngenjumbane njengomuntu obuyisele uMnu Molefe kwa-Eskom - njengoba kwenza i-ANC manje.
Kakukwazi ukuthi uNgqongqoshe Brown ubengasuka nje eyedwa, kungazi ngisho usomlomo, umengameli nozakwabo, abuyisele uMnu Molefe kwaEskom. Kukhona okushaya amanzi kulolu daba. Khona-ke nje ukuba izwe litshelwe ukuthi uMnu Molefe ubesekhefini elingakhokhelwa, kuyasixaka ngoba uqashiwe ephalamende.
Uqashwe kanjani ephalamende ebe engasulanga kwa-Eskom? Phela lokho kuyosho ukuthi kuzidlalelwa umas’gcozi kuleli phalamende laseNingizimu Afrika - uma abantu bezokwenza sengathi yisemakhishini asemakubo, bangene uma bethanda baphume futhi uma bethanda.
Kuyimanje i-ANC - uMnu Molefe ayilunga layo - yiyona esithi okwenziwe odabeni lwakhe kufana nokwephula umthetho ngoba kuyacaca ukuthi kunabantu abahubhuze amanga kodwa bethathe isifungo. Leli qembu lithi lithembele kokuvezwe nguNkk Brown noMnu Molefe ukuze lize limfungise njengelunga lephalamende.
Yilokho nje kuphela elikwenzile ukuqinisekisa ukuthi akasaqashiwe kwaEskom? Kuyiqiniso elibuhlungu ukuthi ngesikhathi uMnu Thabo Mbeki engumengameli wezwe, imigilingwane efuze lo abantu baseNingizimu Afrika babegcina ngokuyizwa ezinganekwaneni.
Sonke lesi sidididi sikhombisa ukuthi kwa-Eskom kunobuholi obuxegayo kanti nayo i-ANC siyibeka njengeqembu elingazinaki izinto ezibalulekile.
Uma kuwukuthi uNkk Brown ubeyedwa ekugxumagxumiseni uMnu Molefe - emshonisa ephalamende aphinde ambuyisele kwa-Eskom - kulungile makathathelwe izinyathelo futhi izwe laziswe ukuthi kungani ebenza lokhu. Uma kuwukuthi ubekwenza lokhu ngomyalelo womuntu noma abantu abathile, kumele baziwe labo bantu.
UMnu Molefe yena siqu sakhe ngeke samfela umona, siyezwa ukuthi umsebenzi wakhe uwenza ngendlela encomekayo kwa-Eskom kodwa lokho ngeke kwasithulisa uma ngabe izinto sezinje ngoba kuyacaca ukuthi naye uvumile ukwenziwa ithuluzi, kudlalwa ngaye ipolitiki.
I-ANC kumele izinuke amakhwapha ngoba ukuba ilalele abantu abafana noMnu Dodovu, ngabe kakunjena namhlanje.
Yize sikhala ngemali ezochitheka kodwa uma lolu daba kufanele luye enkantolo ukuze kucace ukuthi uMnu Molefe ubuyiselwe ngokusemthethweni yini kwa-Eskom, kulungile ngoba siyazi ukuthi izinkantolo zona kazisebenzisi intando yeningi le egcina isisetshenziswa budlabha ephalamende ukushaya imithetho evumela osopolitiki ukuba baxhaphaze abantukazana.
Sekucacile ukuthi yizona kuphela izinkantolo ezingalamulela izakhamizi zakuleli ekuxhashazweni ngosopolitiki abanogovane abangaphandle, bese kuthi uma izinkantolo zikhipha izinqumo ezivuna abantukazana, kuzwakale bona osopolitiki besho ngengila, bekhala ubumayemaye.
I-ANC bekufanele ngabe yiyona nje kuqala enikele enkantolo ngalolu daba. Siyafisa ukwazi nakhona-ke ukuthi njengoba esebuyela kwa-Eskom, yimalini azoxhawulwa ngayo ephalamende ngoba phela sekwaba yisiko ukuba izikhulu ezidumile uma zishiya ngendlela engaqondile lapho beziqashwe khona, kuzwakale ukuthi zinikwe umphako wezishaqane zemali.
Siyacela ukuba luphuthunywe lolu daba, izwe litshelwe ukuthi empeleni kwenzekeni ngesikhathi uMnu Molefe eshiya kwa-Eskom njengoba esebuyiselwa nje ngoba indaba yakhe ibukeka idida ngisho izazi.