AKUDINGEKI INKECE UKUZE KUTHOLAK KALE IZIKHUTHAZI ZASENSIMINI
UBUSIKA yisikhathi esingasetshenziswa ukuhlelela uhlobo lomquba umlimi azolusebenzisa uma kuthwasa ihlobo, eselungiselela ukuhlwanyela.
Kuba kuhle nxa uvundisa ngomquba ngaphambi kokuhlwanyela, bese kuya ngohlobo lwezitshalo ukuthi zidinga uwuphinde nini futhi umquba emhlabathini. Imiquba yezilwane ihluka kakhulu ngenxa yokuthi imigudu yazo - ehamba ukudla - kayifani, ngakho-ke indle iphuma inesigubu esingafani, okusho ukuthi kumele siqikelele uma siyisebenzisa ngoba enye iyashesha ukuvuthwa kunenye - ukuze zilungele ukusetshenziswa.
Umquba wezinkomo: Njengoba sazi, isisu senkomo sinamagumbi amane lapho ukudla kugayeka khona kuzishintshashintsha njalo ngesikhathi yetshisa.
Lokhu sikubona ngesikhathi inkomo iziphumulele kodwa ilibele ihlafune njalo. Kuthiwa kuthatha izinsuku ezili-18 ukudlulisa ukudla esiswini senkomo, ngale ndlela ubulongwe buphuma sebubuncane, oyinto okumele yenzeke ukuze bube sezingeni lokuba wusizo ezitshalweni.
Ubulongwe buwusizo emhlabathini ngqo ngoba bengeza isigubu esihle emzimbeni wawo. Kasikuncomi kodwa ukusetshenziswa kobulongwe ngqo emhlabathini noma ezitshalweni.
Sengathi ungangeniswa embizeni yamakhomposti kuqala. Lokhu kuzokusiza ngokuba uma ngabe umquba uwucele kwamakhelwane noma ngabe zifo zini ofika uziqukethe, zizosha zife emakhompostini ungakasetshenziswa umquba ensimini.
Umquba wamahhashi: Wona unomhhadlahhadliso omningi uma uqhathaniswa nowenkomo. Kumele uqaphele uma ucela umquba kubafuyi bamahhashi ngoba kwesinye isikhathi basuke bechele ngezi-
bulalazinambuzane ezitebeleni, okwenza ube nobuthi obungadingeki ohlelweni lwechabuthi.
Umquba wembuzi nezimvu: Ngesikhathi ukudla kugayeka esiswini sembuzi, kumunceka umswakama ngendlela eyedlulele okwenza amanqatha embuzi aphume omile kunobulongwe benkomo, kodwa usuke uqukethe isikhuthazakhaba nongisawoti wephothaziyamu omningi, okuyizinto ezidingeka kakhulu ngesikhathi kuhluma isiqu namagatsha esitshalo.
Umquba wezinkukhu: Inkukhu phela wumakhonya ngoba yonke into ephuma kuyona iwusizo kithina.
Zilinganiselwa e-10kg izitingi ezikhishwa yinkukhu ngayinye ngonyaka. Izitingi zenkukhu kazidingi isikhathi ukuvuthiswa, ziphuma sezilungele ukusebenza, kodwa uma uthela umquba omningi ezitshalweni, kungenzeka ushise izimpande zazo. Qaphela futhi ukuthi ungatheli umquba esitshalweni ngqo, wuthele emhlabathini oseduze kwaso.
Umquba kanogwaja singawusebenzisa kwikhomposti, unesikhuthazakhaba esiningi kakhulu ngakho-ke ungawuxuba nezicucu zamaphepha uma wenza imibhede yezibaya zeminyundu futhi uyakwazi ukuwusebenzisa masinyane ngqo ezitshalweni.
Qaphela! Ungasebenzisi umquba wendle yamakati nezinja ngoba kungenzeka ube namagciwane anobungozi kubantu futhi kawafi ngisho noma ngabe indle seyiyindala kangakanani. Kungenzeka kube unemfuyo ethize kodwa kawunasiqiniseko ngokusebenziseka kwendle yayo, ungathintana nehhovisi lethu ngendlela ejwayelekile kwethi: 082 789 4281 noma ubhale ekhelini elithi www.sicelokunene.
co.za , ekhasini elithi: Contact us